Кога жената заработува повеќе од мажот

Денес се среќаваме со се поголем број на жени кои се на добри позиции, кои одлично заработуваат и им е доволно да можат да живеат потполно самостојно. Таквиот тренд е присутен и кај нас. Но, тоа создава други проблеми. Успешната, современа и модрена жена веќе нема материјални проблеми, но тоа честопати ја чини мир во домот. Денес е се поголем бројот на  бракови во кои жената заработува повеќе од својот сопруг, што е причина за постојани тензии во заедницата.

Мажите, велат психотерапевтите, тешко го прифаќаат фактот дека нивните жени заработуваат повеќе од нив. Проблемот што тогаш се јавува произлегува од патријахалниот модел на општествените улоги на мажите и на жените. Тие додаваат дека во овој модел, карактеристичен за општетсво во кое тешко се живее, мажот е тој кој излегува и оттаму носи храна и пари,а жената е таа која е столбот на куќата и на семејството и за тоа води грижа.

Пред неколку генерации едноставно не доаѓало предвид жената да работи, бидејќи се сметало дека не може истовремено да биде и добра жена, домаќинка и мајка. Ако овој проблем постои и во вашиот брак, психолозите советуваат веднаш нешто да превземете.

• Прво и најважно е жената да го препознае проблемот. Ова е многу важно бидејќи ретки се оние мажи кои за проблемот ќе им кажат директно – жал ми е што имаш поголема плата од мојата. Наместо тоа, мажот попрво ќе даде забелешка дека супата не е доволно солена, дека кошулата не му е испеглана, дека децата не се искапени или дека тепихот не е исчистен, набројуваат психолозите. Најчесто на жената и се забележува дека ги запоставила останатите свои обврски, па поради тоа некогаш е тешко да се препознае што е вистинскиот проблем, додаваат тие.

Најдобро е секој пат кога вашиот маж за нешто ќе ви забележи дека не сте го направиле добро, да размислите што е всушност причината за таквата критика, а тогаш обидете се и правилно да изреагирате.

• Жената треба да погледне длабоко зад молчењето на мажот, неговата лутина, депресија, мрзоволност или ладниот однос и да види дека всушност тој е едно уплашено дете кое се плаши дека таа нема да го сака ако сфати дека може без него. Затоа, најдобро е во такви ситуации жената која сака да го среди тој проблем во бракот, да го бодри својот маж и да ја поттикнува неговата машкост и мажевност. Главната порака треба да биде дека парите немаат никаква врска со тоа дали некој е машко или женско, заклучуваат психолозите.

• Не е проблемот во вашето повеќе, туку во неговото  помалку. На мажите не им е најголем проблем тоа што жената има поголема плата од нив, туку фактот што тој има помала плата од неа. Тогаш мажите се чувствуваат дека на некој начин се финансиски кастрирани, како повеќе да не се мажи. Таквите мажи, подвлекуваат психолозите, се чувствуваат помалку моќни од своите жени, односно немоќни, а немоќта на латински значи импотенција.