Пишуваат: Доц. д-р Катарина Ставриќ, имунолог-педијатар и Д-р сци. Александар Сајковски, педијатар
Не постои поприроден и подобар начин на исхрана на бебето од доењето. Тоа е еден природен процес, а техниката на доењето лесно се учи, па затоа клуч за успешно доење е вежбањето и трпението. Доењето треба да почне веднаш по породувањето, во првиот час и тоа е единствена, најсоодветна и идеална исхрана без додатоци во првите 4-6 месеци.
Мајчиното млеко е најкомплетна храна за бебето во првите месеци од животот. Со него се обезбедува правилно растење и развој, а доењето носи и бројни погодности како за детето така и за мајката.
Поволности за бебето
- Огромен број на клинички студии покажаа дека доени бебиња поретко се разболуват, а и самите болести најчесто во форма на инфекции поминуваат полесно.
- Недоносените бебиња кои се доени имаат поголем коефициент на интелигенција.
- Доењето обезбедува емоционална сигурност и намалување на стресот, преку тесната поврзаност мајка-дете. Доените деца помалку плачат.
- Доењето доведува до побрз развој на мускулатурата и коските на лицето.
- Поретки се инфекциите на респираторниот систем, дијабетот и малигните болести кај деца кои се доени.
- Кај деца кои се доени помалку од 6 месеци за седум пати се почести алергиските заболувања.
- Десет пати е поголема можноста за прием во болница во текот на првата година кај бебиња кои не се доени.
- Доени деца имаат сигнификантно помал ризик да умрат од т.н. синдром на ненадејна смрт.
- Се намалува ризикот од дефицит на витамин А.
Поволности за мајката
- Доењето и помага на мајката побргу да закрепне од породувањето. Доењето стимулира лачење на хормони кои влијаат на брза контракција на матката, а пролактинот (хормон кој учествува во создавањето на мајчиното млеко) делува релаксирачки врз мајката и го стимулира развојот на мајчините инстинкти.
- При создавање на мајчиното млеко, мајката губи калории, со што се овозможува контролата на тежината по породувањето.
- Дејствува контрацептивно, со што се одложува периодот за нова бременост.
- Кај мајки кои дојат помал е ризикот за развој на рак на дојка, на грло на матка и остеопороза.
- Доењето е практично, евтино и секогаш достапно.
Огромен број на клинички студии покажаа дека доените бебиња поретко се разболуват, а и самите болести најчесто во форма на инфекции поминуваат полесно
Предности на доењето
- Тоа е природен начин на исхрана на бебето.
- Мајчиното млеко содржи идеална рамнотежа на прехранбените елементи. Тоа е единствена комбинација на масти, шеќери, минерали, белковини, витамини и ензими кои обезбедуваат оптимален развој на мозокот и воопшто на бебето.
- Мајчиното млеко се менува со промената на нутритивните потреби на бебето. Првото млеко (колострум) е богато со лесно сварливи протеини, витамини и минерали и се менува во зрело млеко. Колострумот е одлична прва храна за бебето во првиот месец од животот. Тој обезбедува отпорност кон бактерии и вируси со кои тоа доаѓа во контакт, дејствува како природен лаксатив и со тоа го намалува ризикот од бебешката жолтица, а воедно и доведува до брзо отстранување на мекониумот. Содржи и фактори на растење кои го потпомагаат зреењето на цревната лигавица, со што се спречува развој на алергија и неподнесување на одреден вид на храна.
- Мајчиното млеко содржи антитела кои го заштитуваат бебето од инфекции, па дури и ако планирате да го дохранувате со адаптирани формули, одржувајте го доењето барем во првите 6-8 недели со што се заштитува бебето.
- Мајчиното млеко секогаш е свежо, чисто, незагадено со бактерии, на вистинска температура, лесно сварливо, веднаш достапно на бебето и најевтино.
