Со анализа и споредба на информациите добиени со истражување на Американското здравствено осигурување, со кое биле опфатени повеќе од милион Американци постари од 65 години, и податоците за временските прилики добиени од Националната океанска и атмосферска администрација, научниците се обиделе да откријат колку пациенти посетиле лекар заради болки во зглобовите или во половината за време на дождлив ден и за време на ден без дожд.
Востановиле дека повеќе од вкупно 11 милиони пациенти колку што биле на лекар, процентот на оние кои се жалеле на болка во коските бил еднаков за време на дождлив ден и ден без дожд. Или попрецизно во 6,35 проценти од посетите на лекар за време на дождлив ден пациентите се жалеле на болка во грбот и зглобовите, речиси еднакво како и во ден без дожд – 6,39 проценти.
Научниците ги провериле и податоците од претходната недела, земајќи ја предвид можноста дека пациентот заради болки не бил во состојба да појде на лекар. И повторно ги провериле временските прилики, меѓутоа ни во тој случај не ги поврзале болките и временските прилики.
„Без оглед на временските околности, не најдовме корелација меѓу врнежите и одењето на лекар заради болки во зглобовите и грбот“, рекол водачот на студијата и професор по здравствена политика на универзитетот Харвард Анупам Јена.
Нивниот заклучок е следен: Болните зглобови и болките во грбот се мошне „недоверливи“ прогнозери кога се временските прилики во прашање!
Лошото време и болката
Податоците се поклопуваат со резултатите на претходно спроведените австралиски студии на научниците од Универзитетот во Сиднеј, кои ги споредувале поврзаноста на појавата на болки во долниот дел од грбот, артритичното колено и другите болести врзани за локомоторниот состав, со податоците за времето на австралиската Метеоролошка служба.
Востановиле дека нема никаква поврзаност меѓу временските прилики и појавата на болката, а податоците се собрани меѓу голем број пациенти и нивните лекари ширум Австралија.
Авторите на студијата објасниле дека луѓето посветуваат повеќе внимание на болката кога времето е полошо, а ако тоа е убаво и благо болката не е во преден план.
Меѓутоа, не сите стручњаци се согласуваат со овие тврдења. Д-р Роберт Шмеринг од болницата Бет Израел во Бостон тврди дека е невозможно да се докаже спротивното затоа што секогаш постои можност одредени фактори на временските промени, како барометарскиот притисок или промената на влажноста на воздухорт, да влијаат на личностите кои патат од артритис.
Резултатите од истражувањето се објавени во божиќниот број на медицинското списние БМЈ, во кои најчесто се објавуваат теми со малку „полесна“ содржина.
