Луѓето кои живеат во постудени климатски услови каде има помалку сончева светлина се посклони на алкохолизам. Научниците од САД востановиле врска меѓу просечните температури, часовите сончева светлина и консумирањето алкохол. Податоците од 193 земји укажуваат на тоа дека климата влијае во голема мера на испивањето алкохол и болестите на црниот дроб. Заради тоа лекарите во Шкотска сега бараат рестрикции во рекламирањето алкохол во текот на зимските месеци.
Еден од авторите на студијата Ремно Баталер од Центарот за истражување болести на црниот дроб, рекол дека ова е прва студија која систематски покажува дека ширум светот и во Америка во постудените делови и областите со помалку сонце, луѓето повеќе пијат и има повеќе случаи на цироза на црниот дроб.
Алкохолот е вазодилататор, односно ги релаксира крвните садови и го зголемува протокот на топла крв кон кожата, наведува Би-би-си. Консумирањето алкохол е, исто така, поврзано со депресијата, која е поизразена во подрачјата со помалку сонце.
Докторот Питер МекКан, медицински советник во болницата Кастле Крег, на Клиниката за рехабилитација од дрога и алкохол во Шкотска, а кој учествувал во истражувањето, пак, рекол дека постојат докази дека времето, односно температурата и количеството на сонце на која е изложен човекот има силно влијание врз количеството на консумиран алкохол.
„Ова консумирање алкохол е поврзано со времето и директно се доведува во врска со развојот на најлошата болест на црниот дроб – цирозата“, рекол тој, додавајќи дека лекарите ќе се залагаат да се воведат рестрикции во рекламирањето алкохол во текот на зимските месеци.
