Во домашната кујна, ЦЕЛЕРОТ е најпознат како неизбежен додаток во супите, но и како вкусен зеленчуков прилог на многу јадења. Од него се подготвува пире и крем супа, се служи запечен, во салати. Многу лесно се вклопува со многу јадења и е многу хранлив и здрав.
Богат извор е на антиоксиданти и корисни ензими, витамини и минерали, како витамините К, Ц и Б6. Поради малата содржина на калории, само 14 на 100 грама, како и поради високиот процент на влакна кои даваат чувство на ситост и ја поттикнуваат дигестијата, претставува одличен избор за оние кои сакаат да ослабат. Високиот процент на вода и електролити во целерот спречуваат дехидрација, па е добро да се консумира во период на зајакнато потење, а посебни соединенија во него му помагаат да делува и како диуретик и на намалува подуеноста.
Други предности на целерот ја вклучуваат неговата способност за подобрување на здравјето на црниот дроб, кожата, очите и когнитивното здравје, го намалува крвниот притисок и холестеролот, а благодарение на фолната киселина и витаминот Б6 го спречува ризикот за болести на срцето и крвните садови.
Целерот содржи антиоксиданти и полисахариди за кои се знае дека делуваат како антиинфламаторни лекови, а токму воспалението е чест причинител за хроничните болести како ракот, болести на срцето и артритсот. Поради тоа, тој е корисен во лекување на широк распон на состојби кои се влошени токму поради воспалението.
За да му обезбеди на организмот што повеќе хранливи состојки, најдобро е да се консумира свеж, а хранливите состојки целерот ги задржува и ако кратко се провари, но не подолго од пет минути. Имено, некои соединенија во него, вклучувајќи ги флавоноидите и полифенолите се многу чувствителни и може да се изгубат ако се претера со термичката обработка. Не му одговара ниту предолго готвење, дури ни подготовка на пареа, бидејќи на тој начин се зголемува апсорпцијата на вода и станува жилав.
За здравјето е корисен и свежо подготвен сок од суров корен, листови и стебленца, а во таква форма делува како помош и во рани фази на ревматизам, и помага во регулирање на месечниот менструален циклус.
