Агенцијата за стандард на прехранбените производи (FSA) од Велика Британија предупреди дека од сурово брашно може да се добие бактеријата ешерихија коли, која предизвикува повраќање и дијареја и може да доведе до оштетување на бубрезите.
Нивното предупредување следуваше откако се појавија повеќе случаи на заразени лица кои ја внеле бактеријата во организмот, веројатно, по лижење на маталките од миксерот со сурова смеса и на тој начин и овозможиле на бактеријата да влезе во организмот.
Не се советува да се јаде сурово брашно или производи што го содржат, бидејќи постои ризик да се контаминирани. Соодветна термичка обработка осигурува дека сите штетни бактерии се уништени
Затоа за време на празниците и при подготовката на разни десерти воздржете се од лижење на маталките на миксерот по подготовка на колачите. Ова, исто така, важи и за садот во кој сте ја направиле таа мешавина. Особено внимавајте кога се децата во прашање, затоа што тие обожаваат да го прават тоа.
Инаку, покрај суровото брашно, не треба да ги лижете смесите за колачи и поради суровите јајца, од кои некогаш излегуваат опасни зарази, како што е, на пример, салмонелата.
Со термичка обработка овие бактерии се уништуваат.
