Малку мотивација пред понеделник: Не двоумете се да почнете со оваа активност, ќе бидете посреќни и посамоуверени

Со вежбањето се излачува таканаречениот хормон на среќа, а се зголемува и самодовербата, па ако започнете од утре, односно од понеделник, имате поголеми шанси да продолжите да вежбате во текот на целата недела

Личниот тренер Џилијан Мајклс, познат по американската верзија на шоуто „Живот на вага“ ги знае изговорите на мрзеливите луѓе. Тврди дека луѓето мора самите да сфатат дека спортот им треба за здравје. Меѓу најчестите изговори се недостаток на време, финансиски проблеми, прекумерна љубов кон нездравата храна, немотивираност, замор…

Најдобриот тренинг е оној кој можете да го правите на редовна основа

Но ако почнете со вежбање од понеделник, постои поголема шанса дека ќе продолжите да вежбате во текот на целата недела. „Има нешто посебно во вежбањето во понеделник што ве поттикнува да продолжите по вистинскиот пат“, вели писателката Гречен Рубин. „Откако ќе влезете во рутина, се потешко е да го прекинете синџирот и да престанете да вежбате“, додава Рубин, која инспирира илјадници луѓе со своите мотивациски говори.

Почетниците треба да направат план за тренинг и исхрана до кои ќе се држат

На сите ни е позната депресијата во почетокот на неделата, кога треба да се вратите на работа по одморот преку викенд, но вежбањето може да ви помогне во тоа. Со вежбањето се излачува таканаречениот хормон на среќата, а, исто така, и се зголемува самодовербата, пишува dailyburn.com.

Ако имате проблем со спиењето, вежбањето може да ви помогне и во тоа. Луѓето кои редовно тренираат спијат подобро и поквалитетно. Дополнително, ќе ја подобрите вашата концентрација и памтење и ќе бидете поефикасни на работа.

Џилијан Мајклс им советува на почетниците да направат план за тренинг и исхрана до кои ќе се држат. Вели и дека не мора да се оди во теретана и да се вежба секојдневно со часови, но 30 до 40 минути неколку пати неделно може да направат многу за вашето тело. Мајклс советува да почнете со нешто кое не ви е многу напорно како пешачење, јога или пилатес, и додава дека најдобриот тренинг е оној кој можете да го правите на редовна основа.

Освен тоа, кажете им на своите најдобри пријатели и семејство дека ќе започнете со тренинг или приклучете се на групно вежбање. Ќе ви биде потребна поддршка, но и трпение и храброст. Бидете добри за себе и не се откажувајте.