Мажи пијте јогурт – го намалува ризикот од рак на дебело црево!

Консумирањето јогурт најмалку два пати неделно ги штити мажите од рак на дебелото црево, се вели во студијата направена на Универзитетот во Сент Луис.

Авторите на студијата тврдат дека мажите кои пијат најмалку две чаши јогурт неделно имаат за 20 отсто помал ризик од развој на израстоци во дебелото црево, познати како аденоми. Исто така, имаат и за 26 проценти помал ризик од израсток кој може да се појави, и да стане малиген.

„Овие податоци укажуваат на тоа дека одделни карактеристики на јогурот, како што е неговата потенцијална улога во менувањето на природните бактерии во цревата, можат да имаат превентивно делување кај состојби како што е ракот“, рекол Ендрју Чан, водачот на истражувањето.

Сепак, истражувачите предупредиле дека студијата не докажува дека јогуртот самостојно спречува рак, туку дека може да биде од помош против оваа малигна болест. Тимот на научници тврди и дека овие резултати се поддржани со претходните студии кои сугерираат дека консумирањето јогурт може да го намали ризикот од рак на дебелото црево така што ќе влијае на видот и бројот на бактерии во цревата.

 

Аденомите и аденомските полипи се израстоци кои се формираат на внатрешниот ѕид на дебелото црево или ректумот. Тие се преканцерогени, а тоа значи дека ако не се лекуваат, можат да станат малигни.

Во студијата биле вклучени речиси 33 илјади мажи и скоро 56 илјади жени, кои во периодот од 1986 до 2012 година биле подложени на низа тестови, односно на ендоскопија за да се провери дали доаѓа до раст на израстоци во цревата. На секои четири години пополнувале и прашалници поврзани со исхраната и навиките, односно се водела евиденција и за тоа колку јогурт консумираат. За време на истражувањето кај повеќе од 5 800 мажи се развиле полипи на дебелото црево, како и кај повеќе од 8 100 жени. Абнормалниот израсток, кој се нарекува и аденом, претходи на создавањето рак. Се покажало и дека мажите кои консумирале јогурт најмалку двапати неделно, имале за 26 проценти помал ризик од развој на аденом. Нивниот ризик за неканцерогени аденоми бил за 19 отсто понизок, откриле истражувачите.

Меѓутоа, тие не нашле значајна врска меѓу консумирањето јогурт и намалувањето на ризикот од појава на аденом кај жените.