МИТ ИЛИ ВИСТИНА – Ќе јадам помалку за да ми се собере желудникот!

Заблуда! Затоа што желудникот не може да „се собере“, па затоа ако сакате да загубите некој килограм не ги намалувајте порциите, туку калориите – и тоа постепено!

Ако го намалите количеството на храна која ја јадете во текот на денот, дали желудникот навистина после некое време ќе стане помал, па се доволни помали порции за да се задоволи желбата за храна?

„Се разбира“, можеби ќе ви каже некој, но… дури и ако е во прашање личност која е во право во врска со многу работи, овде, за жал, тоа нема да биде случај. „Желудникот кој се намалува“ сепак е само мит!

Може ли желудникот да се „намали“?

Сите сме слушнале за теориите за тоа како кога се јаде помалку после некое време организмот почнува да „бара“ помалку, па и апетитот се „ресетира“, а со текот на времето и желудникот се „намалува“, па се јаде помалку.

Ако ова ви звучи смешно, така е затоа што навистина е смешно – велат стручњаците.

Да, желудникот донекаде е еластичен, објаснува американскиот гастроентеролог, доктор Нитин Кумар. И тоа е корисно кога, да речеме, ќе изедеме обилен оброк. Исто така, тој релативно брзо ќе се врати во вообичаената големина, штом се свари изедената храна. Но нема да продолжи да се „собира“, дури ниту ако почнете да јадете многу, многу помалку од обично. Луѓето имаат помалку или повеќе ист желудник без разлика колку килограми имаат. Ако консумирањето помали количества храна е се што би било потребно за желудникот да се „смали“, би можело да се очекува луѓето кои не се дебели да имаат помал желудник од оние кои имаат вишок килограми. Но тоа е е случај, се наведува во студијата објавена во стручниот магазин Gastroenterology.

Tелото не може да се измами!

И понатаму се сомневате? Размислувајте вака: човековиот организам е создаден така да може да прифати количество храна која му е неопходна за задоволување на енергетските потреби дури и во времиња кога нема доволно храна – времињата на голема глад, кои периодично доаѓале низ историјата. Кога желудникот навистина би се смалувал кога јадеме помалку – тоа не би се завршило добро. Во суштина, на повеќето луѓе им се зголемува апетитот кога го намалуваат калорискиот внес.

„Телото почнува да мисли дека сосема ќе изгладнете и се јавува комбинирана физиолошко-хормонална реакција со која организмот се обидува да ве натера да јадете повеќе и да се вратите на килограмите кои ги доживува како нормално“, објаснува доктор Кумар.

Системот тогаш ни го преплавува хормонот на глад грелин и заради тоа, кога сме на диета ни е уште потешко да и оддолееме на храната. Истовремено температурата на телото опаѓа, а метаболизмот се забавува во очајничкиот обид на организмот некако да ја зачува скапоцената енергија. Значи, лекарите велат: драстичното намалување на големината на порциите не само што нема да доведе до намалување на желудникот, туку може да работи и против вас, односно, спротивно од она што сакате да го постигнете. Дури и ако на овој начин успеете да загубите некој килограм, ќе го вратите побрзо од што би сакале, и тоа со камата.

Тогаш, како да се слабее?

Ова се разбира, не значи дека е невозможно да се ослабе, но за да успеете во намерата немојте одеднаш да ги намалувате порциите на минијатурни количества. Правете го тоа постепено за организмот да има доволно време да се навикне на новиот режим на исхрана. Место да престанете да јадете попаметно е калорискиот внес да го намалувате за 100 или 200 калории дневно. Тоа е сосема доволно за килограмите да ги симнувате постепено, а тоа да не остави последици врз вашето здравје и метаболизам. И тоа е единствен начин да бидете сигурни дека организмот овие постапки нема да ги доживее како „изгладнување“ и да почне со сите сили да се спротивставува на вашата намера да ослабете.