На граѓаните им се советува да го разладуваат телото и да пијат доволно течности, бидејќи потењето предизвикува губење повеќе течности што доведува до дехидрација. Се препорачува да се пие негазирана вода и нискокалорични напивки без кофеин, алкохол и шеќер.
Треба да се избегнува директно изложување на сонце во периодот од 10 до 17 часот, особено децата, трудниците, постарите лица, срцевите пациенти и пациентите со хронични заболувања, додека луѓето кои работат на отворено треба почесто да се одмораат, да останат под сенка и да пијат течности секој 30 минути.. Во најтоплиот дел од денот треба да избегнувате излегување на отворено и физичка работа, а се препорачува и редовна употреба на производи со заштитен фактор.
Топлотен удар
Топлотниот удар е најтешка последица на летните горештини, а симптомите се силна главоболка, мачнина и вртоглавица, висока телесна температура, црвена кожа (без потење) и губење на свеста. Неопходно е веднаш да повикате брза помош.
Сончаница
Сончаницата е терморегулаторно нарушување предизвикано од изложување на главата, особено на задниот дел од главата, на висока температура, односно на влијание на сончевата топлина. Во тој момент телото ќе се обиде да го разлади мозокот, на тој начин што ќе се испрати што повеќе ладна крв во главата. Станува збор за опасна комбинација на дехидрација и прегревање на телото.
Последица е да крвните садови во мозокот набрекнат и мозокот отекува од релативно наглото зголемување на волуменот. Симптомите на ваквата појава се многу слични на потрес на мозокот и не се безопасни.
Најчести симптоми се сува кожа со значително покачена телесна температура, главоболка, вртоглавица, немир, збунетост, црвенило на лицето, а набрзо следат зуење во ушите, проблеми со видот и малаксаност.
Во најтешките случаи, лицето е зашеметено, со проширени зеници, па дури и може да се онесвести. Пулсот е брз, а дишењето е плитко и брзо. Лицето треба да се стави под сенка што е можно побрзо и постепено да се разладува како и во случај на топлотен удар. Децата и постарите лица се особено подложни на сончаница.
