Студијата објавена во списанието „Frontiers in Neuroscience“ покажала дека невролошкото здравје зависи од сигналите кои мускулите на нозете ги испраќаат до мозокот и обратно.
Резултатите од истражувањето дале нови индикатори за тоа зошто пациентите со болести како што се мултиплекс склероза, атрофија на спиналните мускули и други невролошки болести набрзо доживуваат влошување на состојбата откако нивното движење ќе стане ограничено.
Со помалку вежбање, телото многу потешко создава нови нервни клетки кои му овозможуваат на човекот да се прилагоди на стресот и животните предизвици
„Нашата студија покажа дека луѓето кои не можат да прават вежби со оптоварување, како што се пациентите кои се во кревет, па дури и астронаутите на долгите патувања во вселената, не само што губат на мускулна маса, туку им се менува и хемијата на нивното тело на клеточно ниво. Исто така, тоа има значаен ефект врз нивниот нервен систем“, изјавила Рафаела Адами од Универзитетот во Милано, Италија.
За време на студијата, на глувците им било оневозможено користење на нивните задни нозе, додека предните слободно ги користеле. Експериментот траел 28 дена, а глувците продолжиле нормално да јадат и живеат. Ограничувањето на активноста резултирало со намалување на нервните матични клетки за 70 % во споредба со глувците кои можеле да ги користат сите четири шепи.
Ограничувањето на активноста довело до намалување на количеството на кислород во телото, создавање на анаеробна средина и менување на метаболизмот. Така студијата покажува колку е важно движењето.
„Не е случајно дека луѓето треба да бидат активни: одење, трчање, чучнувања, користење на мускулите за подигнување и слично. Невролошкото здравје не е еднонасочна улица каде мозокот им наредува на мускулите“, заклучила Адами.
