Недостатокот на витамин Д е поврзан со интерстицијална белодробна болест (ILD) и нејзина прогресија, покажала новата студија во која биле вклучени 6 302 испитаници. Интерстицијалната белодробна болест претставува група на белодробни заболувања кои влијаат на интерстициумот (ткивото и просторот околу воздушните ќеси на белите дробови).
Најчестите респираторни симптоми кои укажуваат на развој на интерстицијална белодробна болест се диспнеја, непродуктивна кашлица и хипоксија
Фактори кои го зголемуваат ризикот од интерстицијална белодробна болест се:
- Возраста – најчесто се јавува кај возрасни лица;
- Изложеност на токсини;
- Историја на интерстицијална или друга белодробна болест во семејството;
- Хемотерапија и радиотерапија;
- Пушење;
- Терапија со имуномодуланти.
Како што претходно спомнавме, интерстицијалната белодробна болест може да биде предизвикана од долготрајно изложување на опасни материи, како што е азбест. Подеднакво, некои видови на автоимуни болести, како што е ревматоиден артритис, исто така, може да предизвикаат интерстицијална белодробна болест. Во некои случаи, пак, причините се непознати.
Идните истражувања треба да покажат дали надоместувањето на витамин Д може да ја спречи или забави прогресијата на интерстицијалната белодробна болест, пишува „Journal of Nutrition“.
