Ноќното мокрење не е израз на детски бунт или притисок врз родителите. Во повеќето случаи се работи за проблем за кој е потребно да побарате помош од лекар.
Ноќното мокрење (енуреза) се дефинира како несакано истекување на урина преку ноќта кај деца постари од пет години. Ова пореметување е релативно често, па според статистиките, на возраст од пет години дури секое четврто дете мокри во кревет, додека пред поаѓање на училиште ноќното уринирање се јавува кај секое десетто дете. Се проценува дека во Европа повеќе од пет милиони деца мократ во кревет.
Децата со енуреза потешко се будат, па ако создавањето на урина во текот на ноќта е пореметено, односно појачано или капацитетот на мочниот меур е намален доаѓа до мокрење во кревет. За да се утврди основната причина за ноќно мокрење и врз основа на тоа кој пристап за решавање на овој проблем е исправен, потребно е да се консултирате со лекар кој ќе ги изврши потребните испитувања. Енурезата најчесто се решава во соработка со педијатар нефролог.
-
Интересно е да се спомене дека ноќното мокрење има и генетска основа. Ако родителот го имал истиот проблем во детството, веројатноста детето да има енуреза е 40 проценти, а ако проблемот го имале и двајцата родители, процентот се зголемува на 75
Проблемот треба да се реши, а не да се чека да помине сам од себе
Иако ноќното мокрење е пореметување за кое постои решение, многумина погрешно мислат дека единствената опција е да го остават детето само од себе да го надрасне проблемот. Втората најчеста грешка е неоснованото мислење дека уринирањето во кревет е последица на психолошки проблеми или некаков бунт на детето, па таквите деца неретко се казнувани психички или дури и физички.
Во реалноста, речиси секогаш е спротивно, бидејќи децата кои страдаат од хронично нерешено пореметување почнуваат да насобираат низа психолошки проблеми. Овие деца редовно страдаат од недостаток на самодоверба, развиваат погрешна слика за себе и се повлекуваат во социјални ситуации каде што нивниот проблем може да се открие (не одат на излет, не ја минуваат ноќта кај пријател и др.)
Може да остави последици врз психата на детето
Покрај непосредното негативно влијание врз квалитетот на животот на целото семејство, ноќното мокрење кое трае подолго може да остави бројни психолошки, емоционални и социолошки последици врз детето.
Значи, иако механизмите кои се наоѓаат во основата на енурезата кај многу деца созреваат со текот на времето, енурезата претставува комплексен проблем кој може и треба да се реши на време. Доколку детето со наполнети пет години се уште не воспоставило контрола на мокрењето преку ноќ, потребно е да се обратите на доктор.
