Нова надеж за заболените од рак: Комбинација на вијагра и вакцина против грип може да го спречат ширењето на ракот после операција

Неконвенционалната стратегија би можела да му помогне на имунолошкиот систем на пациентот при уништување на клетките на ракот, кои останале после оперативниот зафат

Комбинација на лек против еректилна дисфункција и вакцина против грип може да го спречат ширењето на канцерогените клетки после операцијата, веруваат канадските научници.

Истражувањето, чии резултати се објавени во магазинот „OncuImunnology“, укажува на тоа дека ваквата неконвенционална стратегија би можела да му помогне на имунолошкиот систем на пациентот при уништување на клетките на ракот, кои останале после оперативниот зафат, пренесуваат британските медиуми.

„Операцијата е многу ефикасен начин за отстранување на солидни тумори“, изјавила д-р Ребека Ауер, раководител на Одделот за истражување на рак во Клинички центар во Отава и вонреден професор на Универзитетот Отава, која учествувала во истражувањето.

„Но, за жал, неретко оперативниот зафат го сузбива имунолошкиот систем, па за која било преостаната канцерогена клетка е многу полесно да се одржи и прошири на другите органи“, објаснила Ауер.

Комбинацијата на лекови против еректилната дисфункција и вакцина против грип успешно е тестирана на лабораториски глувци.

Научниците утврдиле дека бројот на метастази на белите дробови на глувците се намалил за дури 90 проценти.

„Резултатите од нашето истражување упатуваат на тоа дека комбинацијата на овие два лека го блокира ширењето на клетките на ракот и помага во превенција на повторна појава на карциноми после оперативниот зафат“, додала д-р Ауер. „Во првите клинички испитувања во кои учествуваат 24 пациенти подложени на операција на абдоминален карцином во нашата болница во Отава, се врши евалуација на ефикасноста на наведената комбинација на лекови. Со испитувања ќе се обидеме да процениме колкава е безбедноста на ваквиот начин на лекување, како и да ги регистрираме промените што се случуваат во имунолошкиот систем по почетокот на делувањето на силденафил (вијагра), тадалафил (Cialis) и инактивирана вакцина Agriflu, базирана на пилешки ембрион.“

Д-р Ауер истакнала дека иако лековите за еректилна дисфункција и вакцината против грип се лесно достапни, лицата заболени од карцином не смеат ни да помислат на самоиницијативно земање.