Стотина различни видови вируси распределени се во бројни семејства, родови и типови кои предизвикуваат различни заболувања, а најчесто се шират преку дишните патишта, дигестивните излачувања, преку крвта и полов пат.
ХРАНА БОГАТА СО НУТРИЕНТИ
Здрав организам и силен имун систем може да се носат со повеќето вирусни инфекции, а за да ги победиме вирусите може да ни помогне храната богата со нутриенти кои ќе ја зголемат отпорноста на телото и ќе го доведат организмот во метаболичка рамнотежа.
Коскената срцевина, тимусот и лимфните јазли, како и клетките и антителата кои излачуваат Б лимфоцити, Т лимфоцити, НК-лимфоцити, фагоцити го составуваат нашиот имун систем кој препознава и одговара на различни антигени со кои се среќаваме. Специфичниот и брз одговор на телото на различните антигени не штити од негативното делување на разни патогени.
Како би ја зачувале функционалноста на имуниот систем многу е важно што јадеме, па треба да внесуваме што повеќе свежи, разновидни, непреработени и сурови намирници како сезонско овошје и зеленчук, јаткасти плодови и семки богати со антиоксиданти, витамини, минерали и елементи во траги.
Потребно е да се одржува оптимална и здрава телесна тежина, оти повеќе здравствени истражувања го поврзуваат начинот на исхрана со здравствениот статус, па во поголем ризик од негативно делување на патогените поради ослабен имун систем се потхранетите лица, како и оние со прекумерна телесна тежина.
ПОЗНАТИ СОЈУЗНИЦИ НА ИМУНИТЕТОТ
Во заштита на организмот може да ни помогнат и нам добро познатите сојузници на имунитетот како лук, ѓумбир, мед, матичен млеч, прополис, ехинацеа. Внесувајте доволно течности и избегнувајте прекумерен внес на алкохол, кофеински напивки и сол. Откажете се од цигарите, бидете физички активни и престојувајте на свеж воздух колку е можно повеќе.
ПРОТЕИНИ – КАДЕ ДА ГИ ПРОНАЈДЕТЕ?
За здравјето на имунитетот од голема важност е адекватниот внес на протеини. Аминокиселината хистидин е важна во производството на црвени и бели крвни клетки нужни за имунитетот, а го штити телото и од оштетувања. Лизин и треонин исто така го јакнат имуниот систем, а аминокиселината Л-глутамин е многу важна токму во сезона на настински, вирусни инфекции и грип. Квалитетните извори на протеини како малкумасно месо, јајца, сурутка и други млечни производи, како и мешунки ќе бидат одличен избор на овие чувари на имунитетот.
ВИТАМИН Ц
Чувар на имунитетот е и витаминот Ц, кој е неопходен за правилно функционирање на имуниот систем и поттикнува активност на леукоцитите и зголемување на нивото на интерферон. Научните истражувања го потврдуваат фактот дека витаминот Ц штити од оксидативен стрес и влијае на процесите на елиминирање на патогените, помага при опоравување на ткивата и го намалува интензитетот на вирусните и бактериските инфекции.
ПРОБИОТИЦИТЕ КАКО БАРИЕРА
Клинички истражувања го потврдуваат и големото значење на пробиотиците кои го штитат и чуваат гастроинтестиналниот систем, во кој се наоѓа голем дел од имуниот систем. Токму здравјето и правилното функционирање на дигестивниот систем и здравата микрофлора ќе бидат бариера при влезот на бројни патогени во нашиот крвоток.
