Окинава диета за подолг живот, вреди да се проба

Главна одлика на Окинава диетата е дека таа е релативно сиромашна со калории, а богата со разни нутритиенти

Во последниве години се повеќе се зборува за различни режими на исхрана кои помагаат во превенцијата од болести и им овозможуваат на луѓето подолго да живеат. Еден од таквите режими е и вообичаената исхрана на жителите на островот Окинава, чии жители се познати по долговечноста. Главна одлика на Окинава диетата е дека таа е релативно сиромашна со калории, а богата со разни нутритиенти. Исто така, околу 78 отсто од исхраната би требало да ја сочинуваат намирници од растително потекло – јадете повеќе соја и производи од соја, а лебот заменетe го со ориз (кој инаку не содржи глутен). Кога станува збор за животинските производи (22 отсто од исхраната) би требало да се одбегнуваат млечните производи, да се ограничи месото, а повеќе да се јаде риба.

Јадете повеќе намирници богати со антиоксиданти како што се овошје, зеленчук, мешунки, зачини и чаеви, потоа со омега-3 масни киселини, како и со магнезиум. Токму овие намирници го забавуваат процесот на стареење, ги ублажуваат воспаленијата и на тој начин ги намалуваат шансите за појава на болест.

Освен исхраната за здрав и долг живот битни се и други животни навики. Редовно бавете се со различни физички активности (ова важи за сите животни доба, доколку е возможно), одржувајте ги контактите со пријателите и семејството и издвојте време за омилените хобија. И конечно на крајот, обидете се да имате позитивен став кон животот и поминувајте што е можно повеќе време во природа.