Рецепт за домашни пастили: Природно, евтино и ефикасно!

Сезоната на грип и тоа како почна, а тоа значи дека воспаленото грло треба некако да се смири. За да не трошите пари на разни лекови, поевтино и поздраво е сами да направите пастили кои ќе ви ги олеснат проблемите со грлото.

Мошне едноставно, а притоа и потполно природно. Вашето грло ќе ви биде благодарно, а еве како да ги направите.

Потребно:

1 филџанче вода во која се потопуваат лековитите билки, свежи или суви (жалфија, мајчина душица, корен од слез, слез, камилица и нане).

½ филџанче мед

Начин на приготвување: Сварете количество вода доволно за две филџанчиња, па во зовриената вода ставете ги тревките. Количеството на тревките зависи од вас, но една лажица од секоја тревка е најмалото ефикасно количество. Оставете ги тревките да се варат 20 минути, па потоа извадете ги од садот за варење. Во друг сад за варење сипете го едното филџанче вода во која се вареле тревките и ½ филџанче мед. Температурата наместете ја средна јачина.

Мешајте ја содржината на таа температурата околу 30 минути. Можете да проверите дали смесата е готова така што ќе земете мало парче и ќе го ставите во студена вода за да видите дали веднаш ќе се стврдне. Исто така, можете да престанете со варење тогаш кога ќе видите дека смесата ќе почне да пени и да се одвојува. Тогаш е важно брзо да се тргне садот од огнот за смесата да не загори. Смесата потоа ставете ја во плех претходно намрсен со кокосово масло и оставете ја да се излади, односно сè додека не можете да ја допрете и да ја обликувате како пастили. Обликуваните пастили потоа посипете ги со шеќер во прав за да спречите да се залепат една за друга.