Научниците од Универзитетот Колумбија откриле начин како да ја отстранат желбата за шеќер кај глувците и тврдат дека еден ден истата оваа техника би можела да се користи и кај луѓето.
Во оваа студија, научниците се фокусирале на слатките и горчливи вкусови, како и на амигдалата, делот од мозокот, кој е од суштинско значење за процесирање на емоциите
„Нашите претходни студии открија јасна поделба помеѓу слатките и горчливи подрачја во кортексот“, изјавил д-р Ли Ванг, предводник на истражувањето.
„Новата студија покажа дека оваа поделба продолжува се до амигдалата. Сегрегацијата помеѓу слаткото и горчливо подрачје во островскиот кортекс (insular cortex) и во амигдалата значи дека можеме независно да манипулираме со овие области на мозокот и да ги набљудуваме настанатите промени во однесувањето.“
Тимот направил неколку експерименти во кои слатките или горчливи врски со амигдалата биле вештачки исклучени. Кога се исклучиле слатките врски, глувците и понатаму биле во можност да препознаат и да направат разлика меѓу слатко и горчливо, но им недостасувале основни емоционални реакции, како преферирање на шеќер или аверзија кон горчливо.
„Тоа е како да ја гризнете својата омилена чоколада, а притоа воопшто да не почувствувате никакво задоволство. После неколку каснувања, веројатно ќе престанете да јадете, додека вообичаено би ја изеле цела“, објаснил д-р Ванг.
Научниците веруваат дека оваа техника еден ден би можела да се примени и на луѓето, како помош во лекувањето на лицата кои страдаат од дебелина или нарушувања во исхраната.
