Сакате да го намалите нивото на кортизол? Направете кратка пауза од социјалните мрежи

Хормонот на стрес лошо влијае на здравјето – предизвикува несоница, анксиозност, го слабее имунитетот, предизвикува разни болести. Обидете се да го сведете на минимум.

Нова студија покажала дека деактивирањето на социјалната мрежа Фејсбук кај поединци значително го намалува нивото на кортизол, хормон на стрес поврзан со развој на несоница и анксиозност, слабеење на функциите на имунитетот, но и покачување на крвниот притисок, болести на срцето и крвните садови, а долгорочно и развој на карцином.

Последици од откажувањето од Фејсбук

Водачот на студијата Ерик Ванман, професор на Австралискиот универзитет, со колегите ги проучувале последиците од откажувањето на Фејсбук и нивното влијание на нивото на стрес, како и на општата здравствена состојба. Вели дека и самиот со години бил нејзин активен корисник. Тоа го поттикнало, во соработка со колегите, да направат експеримент меѓу 138 активни корисници на оваа социјална мрежа. Шеесет случајни избраници морале во целост да се откажат од Фејсбук на пет дена, а останатите 78 продолжиле да го користат. Ванман и колегите направиле анкета меѓу испитаниците за тоа во колкава мерка се задоволни со животните околности, за нивното на стрес, за расположението и дали чувствувале осаменост пред и после експериментот. Во исто време преку плунката им го тестирале и нивото на кортизол.

Позитивни и негативни ефекти

Истражувачите заклучиле дека и краткиот прекин на користење Фејсбук на корисниците има позитивни и негативни ефекти. Рекле дека со откажувањето во првите неколку дена кај корисниците стресот се намалил, но дека кортизолот повторно се зголемил кога Фејсбукот почнал да им недостасува.

„Поранешни истражувања покажале дека поради често користење на Фејсбук многу луѓе се чуввствувале лошо. Затоа многумина трајно се откажале од него, а некои апстинирале од оваа социјална мрежа на неколку денови, месеци„, рекол Ванман.

„Нашата студија покажала дека одмор од само пет дена е доволно да се намали нивото на кортизол. Кај контролираната група која и понатаму го користела Фејсбукот, нивото на кортизол била покачена. Но, забележавме уште нешто: лицата кои се откажале на пет дена рекле дека се помалку задоволни од животот. Повеќето од нив биле посреќни кога студијата завршила и кога се вратиле на старата навика„, изјавил проф. Ванман.

Еден од позитивните ефекти од откажувањето од социјалната мрежа е тоа што овие луѓе поголемиот дел од времето го поминувале со пријателите.

Како и многу истражувања и ова е со недостатоци: „Не ни е познато колку време е потребно да се намали нивото на кортизол по напуштањето на Фејсбук и после колку време ќе почне да се зголемува откако повторно ќе бидете активни„, рекол професорот и на крајот додал дека тој и неговите колеги сметаат дека е слична ситуацијата и со другите социјални мрежи.