Што да направите да ви проциркулира крвта

Слабиот крвоток има многу посериозни последици отколку студените раце и нозе на кои повозрасните лица се жалат. За еластичноста на артериите неопходно е да бидете физички активни.

Слабата циркулација е многу поголем проблем од она на што повозрасните лица вообичаено се жалат – студени раце и нозе. Поради слабиот крвоток се јавуваат и симптоми во различни делови од телото, кои може да имаат и сериозни последици. Имено, слабата циркулација е одговорна и за срцевите и за мозочните удари, но и за ампутација на екстремитетите.

Кога крвата низ организмот не циркулира онака како што треба, ниту органите не се снабдуваат со доволно кислород и хранливи материи, ниту организмот се ослободува од токсини во мера која е неопходна за нормално да функционира.

Лошата циркулација е последица на состојбата на кардиоваскуларниот систем. Иако дел од тие болести се наследни, на здравјето на срцето и крвните садови особено влијаат нездравите животни навики – пушењето, отсуство на активности, несоодветна исхрана. Повозрасните лица дополнително се подложни на овие проблеми бидејќи често се борат со зголемено ниво на шеќер во крвта, а дијабетесот лошо делува на циркулацијата, ги оштетува бубрезите, очите и периферните крвни садови.

Обично луѓето прво се жалат на лоша циркулација во нозете, а стручњаците велат дека тој проблем се развива постепено. Затоа во најраната фаза, болеста често останува незабележана. Стручњаци за крвни садови објаснуваат дека прво се јавуваат грчеви и тежина во нозете. Тие симптоми главно се повлекуваат по одмарање, но за кратко, до следната физичка активност.

Во основа лоша циркулација е атеросклероза.

Тоа е процес кој се развива на ѕидовите на артериите, односно доаѓа до нивно задебелување со создавање на наслаги. Заради тоа, артериите стануваат послабо проодни и крути. Под влијание на ризик факторите – пушење, физичка неактивност, дебелина, зголемени маснотии во крвта, тој процес, велат лекарите, почнува се порано да ги зафаќа сите артерии, од најголемата аорта до најмалите капилари. Така “пропаѓаат“ мозокот, срцето, бубрезите, очите, периферните, но и сите останати крвни садови.

Намалете го проблемот

Лекарите велат дека за да се сочува здравјето на крвните садови, но и другите органи, неопходно е крвните садови да бидат еластични. Тоа најдобро се постигнува со здрав начин на живот. На повозрасните лица, кај кои атеросклерозата е најизразена, им се препорачува задолжителна секојдневна физичка активност и внимателно осмислена исхрана богата со незаситени масти…

Шетање

Еден од начините да ја подобрите циркулацијата во нозете е да пешачите и тоа кратки прошетки, најдобро наутро.

Масажа на нозете

Масажата е одличен начин за подобрување на циркулацијата во стапалата. Масерите имаат посебни техники за масажа на стапалата, но може и сами или со помош на некои помагала, како шише или сукало, да ги измасирате и во домашни услови. Движете ја едната, па другата нога нагоре надоле по шишето со благо притискање. Од помош може да биде и туширањето на нозете, наизменично, со топла, па со студена вода.

Кружни движења

Ова е лесна вежба која може да ја правите додека гледате ТВ. Испружете ги нозете и вртете го секое стопало во насока на сказалките на часовникот, десет пати. Тоа ќе ја зголеми флексибилноста и дотокот на крвта во нозете. Веднаш ќе почувствувате подобрување на циркулацијата и флексибилноста на нозете.

Храна која загрева

За добра циркулација важно е да пиете доволно вода, два литра дневно, но и храна која ќе ви помогне крвта да проструи. На пример лути пиперчиња, рен, ѓумбир… исто така, корисно е да внесувате витамини Ц и Е.