Социјална фобија или социјално анксиозно пореметување е постојан и ирационален страв, поврзан со присутност на други луѓе, што може да прерасне во исклучително тешка и онеспособувачка состојба. Лицето со фобија најчесто настојува да избегне некоја одредена ситуација во која би можело да стане предмет на проценување и вреднување, и да ги покаже знаците на анксиозност или да почне непристојно да се однесува.
Социјалната фобија е честа, а се јавуваат еднакво и кај мажите и кај жените, особено во комбинација со генерализирани анксиозни пореметувања, специфични фобии, панично пореметување…
Лицето кое страда од социјална фобија, се повлекува од луѓето и социјалните ситуации, што дополнително влијае на неговото расположение и ја менува сликата за себе. Познато е дека една од основните човекови потреби е потребата за припадност и почит, кои луѓето ги остваруваат преку контакт со други луѓе и преку дружење. Лицата кои имаат социјална фобија се ускратени од тоа, станувајќи на тој начин несигурни и депресивни. Овие лица треба да се поддржат и да се поттикнат постепено да се изложуваат на дружење со луѓе и социјални ситуации, како би се соочиле со стравот, кој во повеќето случаи е неоснован и ирационален. По согледувањето на симптомите, психолошкото лекување треба да се насочи кон барањето на причините и разбирање на контекстот во кој лицето живее.
