До денес податоците откриваат дека вакцините против КОВИД-19 се безбедни и ефикасни, иако поединци може да доживеат и нуспојави, според пишувањата на Центарот за контрола и превенција на болести.
Според податоците собрани од околу два милиони вакцинирани лица во САД, околу 7 до 10 проценти пријавиле дека по вакцинацијата доживеале некаков вид на болка, а 30 проценти пријавиле дека дополнително страдале од главоболка.
Ако кај вас од претходно се јавува мигрена, главоболката како несакан ефект би можела да ве загрижи, наведува д-р Лорен Штраус, специјалист за главоболки од болницата Wake Forest Baptist Health во САД.
“Загриженоста е целосно разбирлива оти повеќето лица кои страдаат од мигрена знаат дека се што може да предизвика главоболка кај некој друг – вирус, инфекција, недоволно сон, премногу кофеин или премалку кофеин – кај нив често ќе предизивика мигрена“, наведува д-р Штраус.
За подобро да го сфатите ризикот и придобивките од вакцините против КОВИД-19, ова се совети на стручњаците.
НУСПОЈАВИТЕ, КАКО ГЛАВОБОЛКИ, СЕ КРАТКОТРАЈНИ
“Главоболките се дел од она што го нарекуваме системски нуспојави, а вклучува и висока температура, болка во мускулите и зглобовите, а сите тие симптоми траат кратко“, појаснува Емад Естемалик од клиниката Кливленд. Според лекарите, овие симптоми би требало да поминат за 24 до 48 часа, а почесто се јавуваат по втората доза. Исто така, се чини дека помладата популација почесто доживува нуспојави од повозрасната.
НЕ ТРЕБА ДА СЕ ПРЕСКОКНУВА ВТОРАТА ДОЗА, ДУРИ И ДА ИМАТЕ НУСПОЈАВИ
Дури и ако сте имале силна главоболка по првата доза на вакцина, не треба да ја прескокнувате втората доза или да ја одложувате вакцинацијата.
„Едноставно кажано, првата доза може да ја сметате за темел, а втората, всушност, ќе го зајакне производството на антитела и со тоа ќе го зајакне ефектот на вакцината“, додава Естемалик.
СТРУЧЊАЦИТЕ СОВЕТУВААТ ДА НЕ СЕ ЗЕМААТ ТАБЛЕТИ ПРОТИВ БОЛКА ПРЕД ВАКЦИНАЦИЈАТА
Бројни се дискусиите меѓу лекарите дали лицето треба да земе лек како превентивна мерка против мигрена и главоболка, а посебно се разгледува каков ефект лекот може да има на имунолошкиот одговор.
Резултати од студија објавени на почетокот на годинава, покажуваат дека нестероидните антивоспалителни лекови може да го намалат производството на антитела и да влијаат на одговорот на имуниот систем на вирусот.
Стручњаците советуваат дека не би требало да се користат тие лекови пред вакцинацијата.
“Мое мислење е дека не треба да се земаат лекови пред вакцинацијата, а тоа го вклучува и оние против мигрена“, вели д-р Естемалик и советува да испиете доволна количина на вода пред вакцинирањето, оти така ќе превенирате дехидрација која може да предизивика главоболка.
По вакцинацијата, ако се јави главоболка, смее да се земаат лекови против мигрена или главоболка, за да си ги олесните симптомите.
