Симптоми на алергија на студ

Речиси 5% од вкупниот број на пациентите со алергии, страдаат од алергија на студ, која се предизвикува при контакт со студени предмети, како и студениот воздух, студената вода, снегот...

Зимата се смета за време кога мируваат сезонските алергии, но токму во зимските месеци најчесто се појавува алергијата на студ.

Речиси 5% од вкупниот број на пациентите со алергии, страдаат од алергија на студ, која се предизвикува при контакт со студени предмети, како и студениот воздух, студената вода, снегот…


Од осипи до анафилактичен шок

По само неколку минути се јавува уртикарија (осип проследен со чешање), црвенило и отекување, најчесто на местата изложени на студ (лицето и рацете). Може да отечат и устата, очите, ушните школки, носот, челото, или целата глава, се јавуваат и пречки во дишењето, па дури и анафилактичен шок, кој најчесто завршува со смрт, доколку на болниот итно не му се пружи помош. Анафилактичниот шок најчесто се случува на лето, при нагло влегување или скокање во ладна вода.

Од друга страна, пречувствителноста на студено време не дава бурна реакција, па оние лица кои реагираат само со црвенило, или благ осип и чешање, долго време не препознаваат дека се работи за алергија.


Нетипична алергија

Оваа алергија не е целосно разјаснета. Преосетливоста на студ е нетипична во споредба со вообичаената алергиска реакција, бидејќи не е воочена атопија (наследна склоност), па се претпоставува дека алергијата на студ, најверојатно е предизвикана од начинот на живот, стрес, инфекции, други болести…

Лицата алергични на студ ретко се алергични и на нешто друго, што најчесто не е така со останатите алергии (на пример, алергичните на полен, најчесто се алергични и на одредени билки или на одредена храна). Кај некои пациенти во крвта се појавуваат криоглобулини, белковини кои при ниски температури може да се таложат во одредени органи (најчесто бубрезите) и да предизвикаат автоимуна болест криглобулинемија, што бара интернистичко лекување.

Тестирање со коцка мраз

Тест со кој се докажува алергијата на студ се прави така да пациентот на подлактицата 15 минути држи коцка мраз прицврстена со газа. По ова време, кај пречувствителните лица се развива алергиска реакција: осип, црвенило, оток. Во некои случаи се појавува, не само на местото каде што стоел мразот, туку и по целото тело, па тестирањето секогаш се прави многу внимателно.

Симптомите за алергија на студ брзо се повлекуваат, штом болниот ќе се затопли, па најдобра превенција е избегнување контакт со студени предмети, воздух, вода, снег и слично.