Слабеењето го забавува напредувањето на артритисот

Губењето на вишокот килограми може да го намали ризикот од артроза, како и да го забави напредувањето на оваа болест, се вели во едно неодамнешно американско истражување.

Научниците во период од четири години го следеле напредувањето на дегенеративните промени на зглобовите на колената т.е. менискусот, ’рскавицата и коскената срж кај 640 пациенти со вишок килограми кај кои постојат фактори на ризик или веќе им е дијагностициран остеоартритис. Испитаниците од едната група изгубиле 10 отсто од телесната тежина, испитаниците од другата група загубиле 5 до 10 проценти, додека останатите испитаници биле во контролната група (кај нив немало промени на телесната тежина).

Утврдено е дека испитаниците од втората група (со губиток на 5 до 10 проценти телесна тежина) имале помала стапка на дегенерација (пропаѓање) на ’рскавицата отколку личностите од контролната група, додека кај испитаниците од првата група пропаѓањето на ’рскавицата значително се забавило.