Слушањето „екстремна музика” делува инспиративно

Слушањето „екстремна музика” како што е хеви металот делува инспиративно и оттаму има вкупно релаксирачки ефект, пренесува британски „Индепендент“

Новото истражување објавено во магазинот Frontiers in Human Neuroscience, објаснува дека наместо да ги засилува гневот и агресијата, силната хаотична музика всушност ги смирува и инспирира слушателите. Доктор Џеневив Дингл и Леа Шарм од Универзитетот во Квинсленд направиле експеримент во кој учествувале 39 испитаници на возраст меѓу 18 и 34 години, кои често слушале т.н. „екстремна музика”.

Учесниците биле замолени во траење од 16 минути да разговараат за животна ситуација која ги изнервирала, а потоа имале право да одлучат дали да поминат 10 минути слушајќи песна по избор или да стојат во услови на целосна тишина. Потоа психолозите ја набљудувале емоционалната состојба.

„Откривме дека музиката ја регулира тагата и ги засилува позитивните емоции. Таа им помогна на учесниците да го анализираат целиот спектар на испробаните емоции, а на крајот ги направи повеќе активни и инспирирани“, вели Шарм и додава: „Резултатите покажуваат дека нивото на непријателство, раздразливост и стрес се намалуваат по пуштањето на овој вид музика. Најголема, односно најдрастична промена беше забележана во нивото на инспирација кај учесниците.“