Солариумот може да покрене генетски мутации и да предизвика малигнитет

„Нема количество на сончање кое е безбедно“, вели авторката на истражувањето, доктор Тони Барбиџ од медицинскиот факултет при Универзитетот Калгари.

Солариумите се поврзани со поголем ризик од развој на смртоносен рак на кожата – меланом порано во животот, покажало неодамнешното истражување според кое ултравиолетовата светлина за „сончање“ може да покрене генетски мутации кои водат до малигни промени на кожата. Научниците кои биле дел од истражувањето проучиле податоци од 114 пациенти заболени од меланом, кои користеле солариум и 222 со меланом кои не користеле.

Откако зеле предвид и некои други фактори кои можат да влијаат на ризикот за појава на меланоми како полот, типот на кожа, бојата на косата и очите, изложеноста на сонце и семејната историја – научниците процениле дека меланомот се појавува десет години порано кај пациентите кои оделе во солариум. Генетските мутации поврзани со меланомите, исто така, почести се меѓу корисниците на солариумите и се случуваат кај 43 отсто од пациентите во таа група во споредба со 28 проценти од случаите кај пациентите кои не користеле солариуми.

„Нема количество на сончање кое е безбедно“, вели авторката на истражувањето, доктор Тони Барбиџ од медицинскиот факултет при Универзитетот Калгари и додава: „Многу наши пациенти велат дека користеле солариум за да создадат подлога и да спречат изгореници од сонце, но, за жал, со тоа само го засилиле оштетувањето од УВ зраците што резултирало со порана дијагноза на меланом во однос на пациентите кои никогаш не користеле солариуми.“

Клетките од кожата впиваат ултравиолетова светлина во солариумите и тоа води до оштетување на ДНК, појаснува Барбиџ. А тоа оштетување може да води во мутации кои со текот на времето можат да акумулираат и да доведат до развој на карциноми.

Солариумите на помлада возраст, како и продолженото време и честото сончање во солариум, може да го зголеми општото оштетување на ДНК.

Резултатите од истражувањето се објавени во магазинот Journal of the National Cancer Institute.