Дополнувајќи ги своите препораки, ЦДЦ објави дека сите возрасни вакцинирани лица треба да примат “бустер“ доза ако својата втора доза вакцина (Фајзер или Модерна) ја примиле пред најмалку шест месеци или (Џонсон и Џонсон) пред најмалку два месеци, изјави директорката на ЦДЦ, Рошел Валенски.
“Неодамнешната појава на омикрон варијантата дополнително ја нагласува важноста на вакцинацијата, “бустер“ дозата и превенцијата потребни за да се заштитиме од КОВИД-19. Првичните податоци од Јужна Африка покажуваат зголемена преносливост на омикрон сојот“, вели Валенски.
ЦДЦ претходно преорачуваше “бустер“ доза за возрасни лица постари од 50 години, а на 19 ноември ја дозволи и за здрави лица на возраст помеѓу 18 и 49 години, но ним не им ја препорача.
Некои научници ги критикуваа препораките на ЦДЦ, нарекувајќи ги премногу збунувачки.
Д-р Ерик Топол, директор на научниот институт Скрипс во Калифорнија, ги нарече ноемвриските препораки на ЦДЦ “голема грешка“.
Иако многумина зборуваа за делта варијантата како за “пандемија на невакцинираните“, исто така е важно да се разбере дека меѓу заразените има вакцинирани лица чии имунитет создаден со вакцинација е ослабен, напишаа д-р Топол и Мајкл Остерхолм, директор на Центарот за истражување на заразни болести, во Вашингтон пост.
“Повеќе студии покажаа дека целосно вакцинираните лица можат да ја шират делта варијантата. Ова станува уште поверојатно кога имунолошкиот одговор, овозможен со вакцинација, е ослабен. Со оглед дека ‘бустер’ дозите силно ги намалуваат симптоматските инфекции, може да помогнат да се запре зголеменото ширење на кое сведочиме“, напишаа Топол и Остерхолм.
Препораките на ЦДЦ стигнаа три дена откако Светската здравствена организација новиот омикрон сој го препозна како “сој што предизвикува загриженост“.
Меѓутоа, не е јасно дали омикрон ќе ја замени делта варијантата како најлесно пренослив сој на коронавирусот, а веројатно ќе бидат потребни околу две седмици за да се дознае дали вакцините ќе бидат помалку ефикасни ппротив омикрон варојантата, сметаат експерите.
“Не мислам дека постои можност оваа варијанта во целост да ја заобиколи заштитата што ја нудат вакцините. Може само малку да се намали, но тоа е причината и поради која применуваме ‘бустер“ дози“, потенцира Ентони Фаучи, главен здравствен советник во Белата куќа.
