Стресната работа е виновник за тоа што жените добиваат на телесна тежина и со години тие килограми само им се таложат. Секојдневното балансирање помеѓу кариерата, семејството и водењето на домот е многу исцрпувачко и напорно, поради што жените премногу јадат и воопшто не вежбаат, покажало истражување спроведено на Универзитетот во Гетеборг.
Студијата опфатила над 3.800 лица и покажало дека жените кои се оптоварени со работа, главно добиваат на телесна тежина во наредните 10 до 20 години.
Чувството на преоптовареност ги демотивира жените и во останатите сегменти од животот, па утеха бараат во храната и не јадат здраво, утврдило истражувањето. Уште еден виновник за дебелеењето е тоа што стресот воедно поттикнува ослободување на хормонот кортизол, кој е виновник за таложење на масни наслаги околу половината.
Учесниците во студијата биле следени 20 години. На почетокот од истражувањето, 27% жени и 39% мажи имале прекумерна тежина. За време на идната деценија, 33,5% од жените и 26% од мажите ја зголемиле својата телесна тежина за над 10%. Во наредните 20 години, 48,9% од жените ио 43,7% од мажите, на својата веќе зголемена телесна тежина, додале уште 10% од вкупните килограми.
