Последниве недели се почесто слушаме за случаи на пробој на вирусот – меѓу пријатели на пријателите, славни личности политичари…, лица кои се позитивни на тестирањето, иако се комплетно вакцинирани. Некои меѓу нив развиваат симптоми на КОВИД-19, но во поголем дел благи симптоми.
Институтот Роберт Кох во Германија од почетокот на вакцинацијата во февруари евидентирал над 117 илјади случаи на пробој на вирусот, односно инфекции со симптоми. Стручњаците тоа во никаков случај не го објаснуваат со неефикасност на вакцините, кои и понатаму одлично штитат од тешки симптоми, макар биле потребни и “бустер“ дози за одржување на таквото ниво на заштита.
“Морате да знаете дека заштитата од инфекција, шест месеци од вакцинирањето веќе не е толку силна“, вели германскиот виролог Хендрик Стрек.
Со него се согласува и Леиф Сандер, научник на Одделот за заразни болести и респираторна медицина во германската болни Черити.
ЗАШТИТА ОД ПОТЕШКИ БОЛЕСТИ
Заштитата е најсилна две недели по примање на втората доза вакцина, а потоа полека опаѓа, објаснува Сандер. Но, важно е да се истакне дека нивото на заштита кај вакцинираните лица секогаш ќе биде многу поголемо отколку кај невакцинираните, додава тој.
Научната заедница таквиот развој на случувањата нималку не ги изненадува. Водечкиот германски виролог Кристијан Дростен уште во април изјави дека вакцинираните лица веќе по неколку месеци можат да придонесат за ширење на вирусот. А, вирологот Стрек вели дека е многу поважно лицето да биде заштитено од потешки симптоми на болеста, што му го овозможува вакцинирањето, отколку да биде поштедено од реинфекција. Тој додава дека оние кои и покрај вакцинирање ќе заболат, најчесто развиваат благи симптоми, а кај некои вакцинирани лица тие целосно изостануваат.
ПРЕНОС НА ВИРУСОТ
И можноста за пренесување на вирусот се рзликува меѓу вакцинираните и невакцинираните лица.
“Количината на вирус во организмот на вакцинираните се намалува многу побрзо, а вакцината всушност го скратува периодот во текот на кој вирусот може да се пренесе“, објаснува Стрек.
Пробојот на вирусот може да биде опасен кај повозрасните лица чии имунолошки одговор е послаб. Според податоците на германскиот институт, во Германија од февруари од КОВИД-19, починале 1076 вакцинирани лица. Важно е да се истакне дека меѓу нив, 72% биле постари од 80 години.
“Тоа укажува на општо поголемиот ризик од смртен исход кај споменатата возрасна категорија, независно од ефикасноста на вакцината“, соопштува Институтот Роберт Кох. Гледајќи го вкупниот број на заболени “само мал дел од хоспитализираните, кои се на лекување на одделот за интензивна нега или починати, може да се препишат на пробој на вирусот“, велат експертите од Институтот.
ТРЕТА ДОЗА
Во соопштението на Институтот Роберт Кох стои дека порастот на бројот на случаи на пробој е “предвидлив“, бидејќи се повеќе луѓе се вакцинираат, а рестриктивните мерки се ублажуваат, што ја зголемува веројатноста да во контакт со вирусот дојдат и целосно вакцинираните лица.
Сандер предлага “бустер“ доза да се понуди секому, без оглед на возраста, шест месеци по вакцинацијата со втора доза, и смета дека таа би имала “дампинг“ ефект на ширење на вирусот во популацијата. Притоа се повикува на искуството во Израел, каде благодарение на “бустерите“, земјата се извлече од последниот бран на ширење на вирусот.
Од друга страна Стрек не е толкав поборник на трета доза вакцина. Тој истакнува дека на глобално ниво вакцини нема доволно и смета дека е поважно повеќе земји во светот да се обезбедат со втора доза вакцина, отколку да се брза со трета во оние побогати земји. Тој верува дека за здравствените системи би било подобро да ги вакцинираат постарите од 60 години со две дози, отколку лица во дваесети години и со трета доза.
