ВАГИНАЛЕН СЕКРЕТ: Бојата и густината многу кажуваат за женското здравје

Да ве смириме на самиот почеток: најчесто не станува збор за ништо опасно, но...

Секретот се појавува порано или подоцна и кај секоја жена. Може да биде со различна боја и мирис. Во некои денови може да е појак, некогаш послаб, но се случува главно да не е причина за аларм. Тоа е едноставно начин на кој вагината се чисти од штетните бактерии и изумрените клетки и е сосема нормална појава. Сепак, за ова ретко се заборува, па многу жени и по малку се плашат кога ќе забележат дека вагиналниот секрет ја сменил бојата и изгледот. Стручњаците велат дека некои промени се нормални и очекувани за време на менструалниот циклус, додека во некои случаи препорачливо е да се побара совет од гинеколог. Еве кои се најчестите облици на вагинален секрет и кога би било паметно да се посети гинеколог:

Нормални ситуации во кои нема место за паника:

Секретот е проѕирен и тој се појавува секојдневно. Поврзан е со ментруалниот циклус, па обично после менструацијата е послаб, а посилен пред овулација. Исто така, можно е да се засилува после вежбање или секс.

Млечнобел секрет, исто така, може да се појави за време на циклусот, особено во првата половина. Главно не укажува на ништо сериозно, но ако има уште некои симптоми како што е чешањето или ако е мошне густ, можеби станува збор за габична инфекција.

Растегливиот секрет значи дека телото се подготвува за бременост. Околу овулацијата расте количеството на естроген, па затоа и во тој период секретот е посилен од обично и толку е растеглив што може да се развлече меѓу прстите. Се вика уште и ’плодна слуз’ и всушност е знак дека жената може да забремени.

Ако забележите благорозов секрет непосредно пред меструацијата, нема потреба од паника зашто, веројатно, наскоро и ќе почне крвавењето. Но ако ваков секрет забележите во средината на циклусот, тоа би можело да биде ран знак за бременост!

Ситуации во кои треба да појдете кај вашиот гинеколог

Додека млечнобелиот секрет е нормален, оној густиот и грутчест, односно налик на зрнесто сирење не е. Се работи за симптом на габична инфекција која треба да се лекува.

Секретот со мирис на риба би можело да биде симптом за бактериска вагиноза, инфекција предизвикана од бактерии во матката. Болеста обично се лекува со антибиотици, па затоа и треба да се побара стручна помош.