Со влошување на симптомите на менопауза, се зголемува ризикот од појава на срцеви заболувања кај жените

Студијата покажала дека фреквенцијата, а не и јачината на валунзите, е конкретно поврзана со поголема крутост на артериите и дисфункција на крвните садови

Во ублажување на симптомите на менопаузата може да помогне усвојувањето на здрави животни навики, како и хормонската заменска терапија

Како што се влошуваат симптомите на менопауза, така се зголемува и ризикот од срцеви заболувања кај жените, покажала новата американска студија во која биле вклучени 138 жени. Ова е уште една важна студија која ги нагласува специфичните фактори на ризик за срцеви заболувања според полот.

Во сите фази на менопаузата, крутоста на артериите и дисфункцијата на крвните садови, биле поврзани со чести и тешки симптоми на менопаузата кај жените.

Додека претходните истражувања укажувале на силната врска помеѓу топлотните бранови – валунзи и зголемениот ризик од срцеви заболувања и смрт, оваа студија покажала дека фреквенцијата, а не и јачината на валунзите, е конкретно поврзана со поголема крутост на артериите и дисфункција на крвните садови.

Топлотните бранови (валунзите) се еден од најкарактеристичните симптоми на менопаузата

Овие резултати не се изненадување, со оглед на тоа дека е позната улогата на естрогенот по здравјето на срцето. Хормонот естроген е моќен антиоксидант и важен посредник на васкуларното здравје преку неговото влијание врз хормонот серотонин, кој помага во регулирање на телесната температура, нервниот и кардиоваскуларниот систем.

Во ублажување на симптомите на менопаузата може да помогне усвојувањето на здрави животни навики, како и хормонска заменска терапија, која, пак, се поврзува со развојот на одредени видови на рак и мозочен удар, пишува „Menopause“.