Во најава: Експлицитни фотографии на скапани заби наскоро на шишиња со засладени пијалаци

Исто како и на кутиите со цигари, на амбалажата на сокови ќе стои предупредување за нивната штетност

Експлицитни фотографии на расипани заби и здравствени предупредувања за штетноста од засладените пијалаци на шишињата би можеле да ги одвратат младите луѓе од нездравите навики, покажала најновата студија.

Етикети слични на оние на кутиите со цигари кои би вклучувале предупредување за дијабетес, дебелина и проблеми со забите, како и различни прехранбени информации, би можеле да ги поттикнат младите луѓе во помал број да посегнуваат по различни пијалаци засладени со шеќер, пишува „Индепендент“.

„Најновите откритија би можеле многу брзо да доведат до појава на вакви предупредувања на пакувањата на слатките пијалаци ширум светот“, изјавила професорката Ана Питерс од Универзитетот Дикин во Австралија.

Во Велика Британија од неодамна е воведен посебен данок на засладени пијалаци, но има се повеќе гласови, кои велат дека треба да се преземат уште акции за да се реши кризата со дебелината

И додека некои компании одлучија да го променат составот на нивните производи, други ги променија само цените.

„Вистинско прашање е какво влијание би имале сликите на производите врз епидемијата на дебелина. Иако ниту една поединечна мерка не може да го реши овој проблем, постојат силни индикации кои зборуваат дека сликите на амбалажата би имале влијание врз изборот на клиентите“, објаснила професорката Питерс.