Вознемирувачки податоци: Ракот на дојка и препаратите за коса – дали постои врска?

Најновата американска студија сугерира дека одредени препарати за убавина можат сериозно да му наштетат на здравјето...

Новата студија објавена во „International Journal of Cancer“ открила дека кај жените кои користат трајни бои за коса и хемиски препарати за исправување на влакното постои зголемен ризик од рак на дојка. Веста објавена на почетокот на месецов загрижи огромен број жени ширум светот кои косата ја третираат на овој начин. Дали има вистина во ова тврдење?

Истражувањето кое го објавил Националниот институт за здравје во „International Journal of Cancer” анализирало податоци од 46 709 жени, а кои имале сестри или блиски роднини на кои им бил дијагностициран рак. Во време на студијата, испитаниците немале канцер.

Истражувачите откриле дека кај жените кои користеле трајна боја за коса во минатата година за девет проценти им се зголемил ризикот од појава на канцер во однос на оние кои не ја бојадисувале косата. Употребата на трајна боја за коса на секои пет до осум недели била поврзана со зголемување на ризикот од карцином на дојка за 60 отсто кај Афроамериканките, додека кај жените од белата раса овој ризик е зголемен само за 8 отсто.

Влијанието на хемиските препарати за исправање на косата, исто така, било предмет на анализа. Истражувачите откриле дека жените кои се подложувале на нив на секои пет до осум недели имале за 30 отсто поголеми шанси да заболат од карцином на дојка. Статистиките биле слични кај жените од белата раса и Афроамериканките (иако овие почесто се подложувале на овие третмани).

Истражувачите претпоставуваат дека одредени хемиски супстанци во овие производи за коса го уништуваат естрогенот и другите хормони во телото што доведува до зголемен ризик од појава на овој вид тешко заболување. Сепак, научниците се оградуваат и велат дека врската меѓу препаратите за нега на коса и рак на дојка не е прецизно утврдена. Постои уште еден клучен фактор во оваа студија кој треба да се земе предвид, а тоа е наследниот.

„Кај овие жени веќе постои генетска предиспозиција за појава на ова тешко заболување, затоа што секоја од испитаничките имала сестра или блиска роднина која заболела од рак. Така што резултатите од оваа студија не се конечни и би требало да се направат попрецизни анализи пред ние лекарите да им препорачаме на жените да не користат трајни бои за коса“, рекла Стефани Берник, шефицата на одделот на хирургија на онкологија во болницата Маунт Синај Вест.