Кога станува збор за исхраната Џулија Робертс не е типична холивудска актерка. Наместо шејкови на база на млада зелена пченица и намаз од авокадо, кои ги преферираат повеќето ѕвезди во Калифорнија, убавата жена сака „конкретни“ јадења составени од протеини.
Дури и кога јаде салати предност им дава на оние кои се состојат од јајца, сирење, сланина и јаткасти плодови кои даваат енергија, ги градат мускулите и помагаат при губење на тежината.
Шефот Тејлор Будро од ресторанот „Napa Valley Grille“ за магазинот „Пипл“ го откри рецептот за топла салата од прокељ и протеини, која Џулија Робертс редовно ја порачува кога доаѓа кај него.
Топла салата од прокељ, сланина и јајца
Потребни состојки:
- 15 г панчета (италијанска сланина)
- 1 јајце
- козјо сирење, по желба
- 1 лажица тостирани ф’стаци
- 60 г прокељ
- 30 мл прелив за салата
Подготовка:
- Исечете ја панчетата на мали коцки и пржете ја во тавче додека не стане крцкава.
- Измијте го прокељот и исечете го на четвртинки, па пропржете го заедно со сланината.
- Вака подготвениот прокељ зачинете го со прелив направен од една лажица француски сенф, маслиново масло и вински оцет, две лажици сок од лимон, малку сол, црн пипер и зачини од свежи билки, како магдонос и тимијан.
- Врз прокељот посипете ги исечканите тостирани ф’стаци, поширано јајце и малку козјо сирење. Добар апетит!
