Едномесечно бебе може да излегува надвор на прошетка на чист воздух. Кога врне дожд или снег бебето треба да биде соодветно заштитено, а количката покриена така што бебето нема да се наводени. Но раноутринската магла, дождот, невремето или силниот ветар, сепак, не се временски услови за излегување, додека сите други услови, па дури и студовите, околу нула степени, не се никаква пречка за одење надвор.
Заруменети обравчиња не се причина за одење на топло
Во скандинавските земји, бебињата исто така, шетаат во зима. А таму температурите се значително пониски отколку кај нас. Добро е познато дека бебињата и децата во тој дел од Европа се помалку болни и настинати, а сигурно многу повеќе престојуваат на воздух. Интересен е податокот дека децата од јасли и градинка, престојуваат многу на воздух, а во затворен простор одат единствено да спијат и да јадат. И тие се помалку болни.
Надвор со бебе
Се разбира, пред да излезете вашето бебе добро ќе го облечете и ќе го заштитите од студот. Ако температурата е многу ниска, прошетката ќе трае пократко. Повремено ќе ги проверувате рацете и нозете на бебето за да видите дали му е студено. И не грижете се, не е ништо алармантно ако во зима на чист воздух носенцето и обравчињата на бебето се заруменат. Доколку температурата е умерена можете да шетате еден час или два, во зависност од расположението на бебето и вашите желби. Значи, колку што е температурата пониска, толку прошетката е пократка, а колку е попријатно толку подолго можете да шетате.
Во трговски центри
Трговските центри треба да се избегнуваат и во лето и во зима. Тие се климатизирани, сосема неприродни услови и не се предвидени за шетање на деца. Особено во зима, кога има многу луѓе и кога е сезона на грип и слични респираторни заболувања, трговските центри треба да се избегнуваат.
Уште еден совет за прошетка со бебето: Добро е со вас да имате пријателка со бебе на слична возраст, со цел престојот на свеж воздух да биде попријатен и поинтересен и за вас и за вашето бебе.
