Бременоста е природна состојба во животот на жената која бара од неа да посвети поголемо внимание на исхраната и начинот на живот. Погрешна е вообичаената изрека дека една бремена жена треба да јаде за двајца. Напротив.
Доколку мајката не внесува доволно хранливи материи, може да настанат несакани последици за плодот, а многу од нив се видливи веќе во раната детска возраст. Познато е дека несоодветната исхрана за време на бременоста предизвикува раѓање на премало и недоносено дете, додека прекумерната исхрана ја зголемува инциденцата на компликации во бременоста со раѓање на многу крупно дете, кај кое непосредно по раѓањето се јавуваат различни нарушувања. Прекумерната исхрана влијае и на појавата на дијабетес кај бремените жени.
Причините за многу здравствени проблеми кај возрасните луѓе може да се бараат и во неадекватната исхрана на мајката за време на бременоста
Здравата исхрана подразбира разноврсна исхрана. Ова се општите препораки за исхрана на трудниците:
- Редовно јадете главни оброци и ужинки.
- Вклучете во исхраната доволна количина на житарки, овошје, зеленчук, млеко, јогурт, сирење (исклучиво пастеризирано), месо, риба, јајца (исклучиво термички обработени) и мешунки.
- Избегнувајте консумирање намирници богати со преработени јаглехидрати, вклучувајќи и додаден шеќер.
- Поради ризик од труење со неадекватно термички обработени намирници од менито треба да исклучите непастеризирано млеко, сирења од непастеризирано млеко и сирења со мувла.
- Пијте доволна количина на вода и јадете намирници богати со влакна за да спречите евентуален запек.
