Во народната медицина оревот како природен лек е симбол на интелектуалната сила, бидејќи под цврстата кора, која наликува на череп, се наоѓа плодот кој наликува на мозок. Од научна страна, пак, оревот е богат со омега-3 масни киселини, кои навистина се неопходни за здраво функционирање на мозокот. Според тоа, нема дилема дека оревот поволно делува на најважниот човеков орган, кој прави да бидеме она што сме и 24 часа дневно управува со нашето тело.
Овој плод е силен извор на енергија, богат е со многу витамини, минерали и антиоксиданти. Редовното консумирање го зголемува добриот, а го намалува нивото на лошиот холестерол во крвта, ја поттикнува концентрацијата и го подобрува помнењето.
Младите плодови содржат многу витамин Ц и јод поради што традиционалната медицина ги препорачува за лечење на проблеми со штитната жлезда. Од младите ореви и ракија се подготвува прекрасен ликер, кој се користи како народен лек за желудникот, како и за јакнење на крвта.
Чај од листови од орев се препорачува за чистење и јакнење на крвта, јакнење на организмот, го поттикнува варењето, за измивање на рани, против чиреви и мозолчиња, за плакнење на очите и усната шуплина.
Маслото од орев ја штити кожата од сонце, спречува сушење на кожата, корисно е против изгореници, а се користи и за јакнење на косата. Маслото од орев е богато со омега-3 масни киселини и витамините Е, Б1, Б2, Б3. Го намалува нивото на холестерол и триглицериди во крвта, добро е за превентива при кардиоваскуларни заболувања, одлично е во борбата против слободните радикали. Најздраво е да се консумира свежо, како прелив на салата.
