Лицата со прекумерна телесна тежина имаат зголемен ризик од смрт или тешка форма на КОВИД-19, покажал извештајот на Заводот за јавно здравје на Велика Британија, а стручњаците дошле до некои поврзаности помеѓу двете пандемии.
Заводот мината недела објави податоци кои покажуваат дека кај лицата со индекс на телесна маса (BMI – body mass index) од 30 до 35, ризикот од смрт од КОВИД-19 се зголемува за 40 проценти, а за дури 90 проценти кај оние чиј индекс е поголем од 40, во споредба со лица со здрава телесна тежина.
“Сегашните докази се јасни и покажуваат дека прекумрната телесна тежина или дебелината ве ставаат во категорија на поризични за развој на сериозна форма или смрт од КОВИД-19, но и поизложени на многу други сериозни болести“, вели Алисон Тедстон, главен нутриционист во британскиот завод за јавно здравје.
И други истражувања во светот покажуваат дека лицата со прекумерна телесна тежина имаат повисок ризик за компликации при инфекција со новиот коронавирус.
Научниците и натаму се обидуваат да утврдат кој точно механизам би можел да ја појасни врската помеѓу дебелината и КОВИД-19, а засега утврдиле неколку фактори.
Дебелината води до акумулација на маснотии во виталните органи, како и до инсулинска резистенција и висок крвен притисок. Тоа значи дека дебелината често оди рака под рака со други здравствени тегоби како дијабетес, послабо срце и полошо функционирање на црниот дроб и на бубрезите.
Прекумерната акумулација на маснотии може да влијае и на респираторниот систем. Поради дебелината лицата имаат краток здив и им недостасува кислород во крвта и во ткивата.
“Обезноста додава притисок на речиси секој орган или систем во телото“, тврди Сизан Џиб, професор по нутриционизам и јавно здрваје на Универзитетот Оксфорд. Таа додава дека не е изненадувачки што го зголемува и ризикот од компликации поради КОВИД-19.
Масното ткиво исто така има повисоки нивоа на ангиотензин – конвертирачки ензим 2 (ACE2) кој новиот коронавирус го користи за влез во клетките. Лицата со повисоки нивоа на ACE2 во крвта и ткивата полесно може да се заразат со КОВИД-19, сметаат стручњаците.
