Алергијата на кравјо млеко трае подолго отколку што се мислеше, а повеќето деца може да ја „влечат“ чувствителноста на кравјо млеко се додека не појдат на училиште, вели Роберт Вуд од Медицинскиот факултет „Џон Хопкинс“.
„Досега се веруваше дека кај повеќето деца чувствителноста на кравјо млеко исчезнува до тригодишна возраст, но тоа е погрешно“, вели Вуд.
Во истражувањето што го спровел Вуд заедно со своите колеги, било утврдено дека само 19 проценти од децата ја надминуваат чувствителноста на кравјо млеко до нивната четврта година. Уште повеќе, кај некои алергијата на млеко исчезнува дури во тинејџерските години, што досега се сметаше за незамисливо.
Според резултатите од истражувањето, 42 отсто од децата на возраст до 8 години не се алергични на млеко, кај 12-годишниците процентот е 64, додека 79 проценти од децата ја надминуваат алергијата на кравјо млеко до својата 16 година.
