Додатоци за суперздраво кафе

Кафето е вашиот омилен напиток?! Ако одговорот е да, еве неколку идеи како да го направите суперздрав

Повеќе истражувања укажале на позитивните ефекти врз здравјето од умереното пиење кафе. Денес зборуваме за тоа како овој напиток може да се направи уште поздрав, но и поароматичен. Еве неколку предлози:

Цимет – посипете го кафето со цимет во прав или додадете стапче цимет во филџанот, овој зачин има антивирусни и антибактериски својства, што е мошне корисно во постудените месеци, додека истовремено помага во регулирањето на нивоата на шеќер и триглицериди во крвта.

Ѓумбир – во кафето можете да додадете и малку ѓумбир во прав. Ѓумбирот го поттикнува варењето, ја намалува надуеноста и гасовите, а, исто така, помага и кај симптомите на настинка. Овој зачин ги ублажува и болките кај артритис со оглед на тоа дека делува антиинфламаторно.

Какао и црно чоколадо – флавонолите од какаото ја подобруваат циркулацијата, концентрацијата и будноста, го регулираат крвниот притисок и делуваат антиинфламаторно. Додадете една лажичка какао или ставете 2 коцки црно чоколадо во кафето да се растопат.

Кокосовото млеко и кокосовото масло – кокосовото млеко претставува добра алтернатива за кравјото млеко, особено ако сте забележале дека ви пречи лактоза. Кокосовото млеко и кокосовото масло содржат лауринска киселина, која го поттикнува имунитетот и во организмот се претвора во монолаурин, соединение со антивирусни и антибактериски својства. Што се однесува, пак, до количествата, за почеток можете да пробате кафе со додаток на 1 супена лажица кокосово млеко или 1 кафена лажица кокосово масло.

Кокосов шеќер – овој шеќер не се добива од кокос, туку од сокот од цвет од кокосова палма. Содржи помали количества цинк, железо, магнезиум и витамини од Б-комплексот. Кокосовиот шеќер содржи инулин кој делува како пребиотик и така го поттикнува растот на пријателските бактерии во цревата.

Екстракт од ванила – ванилата традиционално се користи не само заради слатката арома, туку и заради нејзините медицински својства. Ванилата ја поттикнува концентрацијата и поволно делува на расположението. Мирисот на ванила, исто така, помага во контролата на апетитот.