Нема ништо необично во тоа што стапалата да ви се студени во текот на зимата, но ако забележите дека често ви требаат подебели чорапи или да навлечете ќебе преку нозете за да ги загреете стапалата, можно е проблемот да е нешто друго, а не во ниските зимски температури.
Хронично студените стапала се поврзани со неколку различни здравствени проблеми, а доколку имате и други проблеми покрај студените стапала, треба да се јавите кај вашиот лекар за да дознаете за што точно се работи.
- Хипотиреоза
Студените стапала може да сигнализираат дека можеби имате проблем со тироидната жлезда. “Тироидната жлезда е важен дел од метаболичките функции во нашите тела“, вели лекарот за итна медицина Кели Џонсон-Арбор.
Ако вашите стапала често се ладни, ова може да укаже дека вашата тироидна жлезда можеби не произведува доволно хормони. Ова се нарекува хипотироидизам, кој е познат и како намалена активност на тироидната жлезда, објаснува докторката.
Покрај студените стапала, луѓето кои го имаат овој здравствен проблем може да искусат и некои други симптоми како што се замор, зголемување на телесната тежина и нетолеранција на ниски температури.
“За среќа, болеста на тироидната жлезда може лесно да се дијагностицира со едноставен тест на крвта. Лекувањето, кое обично вклучува доживотна примена на тироиден хормон, може да помогне да се намалат или елиминираат знаците и симптомите на хипотироидизам“, додава Џонсон-Арбор.
- Дијабетес
Дијабетесот исто така може да биде одговорен за студените стапала. Дејвид Бити, општ лекар, вели дека студените стапала може да бидат знак дека имате дијабетес.
Кај дијабетичарите постои поголема веројатност да развијат периферна васкуларна болест, состојба во која “артериското снабдување со крв на екстремитетите е намалено или, во екстремни случаи, целосно блокирано“, објаснува д-р Бити.
“Освен тоа, мастите, холестеролот и другите материи формираат наслаги кои ги затнуваат артериите, намалувајќи го протокот на крв во стапалата. Како резултат на тоа, циркулацијата во екстремитетите може да биде нарушена“, додава д-р Бити и објаснува дека тоа резултира со студени стапала. Покрај студените стапала, периферната васкуларна болест може да предизвика и други симптоми – лицето може да биде ладно на допир или многу бледо.
- Анемија
Кели К. Мидлтон, лекар и ортопед хирург, наведува дека постојаното чувство на студ е поврзано и со анемија, состојба која се јавува поради недостаток на железо или витамин Б-12. Таа додава дека луѓето со анемија може да имаат и други симптоми како што се замор, бледа кожа и срцебиење.
Д-р Џонсон-Арбор вели дека анемијата се јавува кога бројот на црвени крвни зрнца во вашето тело се намалува. “Црвените крвни зрнца носат кислород до ткивата низ телото. Кај анемичните пациенти, слабата циркулација е резултат на недостаток на доставување кислород до ткивата“, објаснува таа.
- Проблеми со белите дробови
Респираторниот терапевт Џон Ландри вели дека студените стапала може да упатуваат на неколку проблеми со белите дробови, вклучително и хронична опструктивна белодробна болест (ХОББ), пулмонална хипертензија и пулмонална емболија. Ако некое лице има ХОББ и пулмонална хипертензија, покрај студените стапала, може да забележи и симптоми како што се отежнато дишење, замор, болка во градите и стегање во градите.
- Труење
Д-р Џонсон-Арбор додава дека студените стапала може да укажуваат и на труење од контаминирана риба. Главно се работи за видови тропски риби, а освен студени стапала може да се јават и симптоми како мачнина и болки во стомакот.
