Познато е дека голем процент од населението во земјава помалку или повеќе неконтролирано, на своја рака консумира различни додатоци во исхраната, било да станува збор за оние со витаминско-минерален состав или за оние кои како самопомош ги користиме за одредени индикации (најчесто средства за јакнење на имунитетот или средства за самопомош при слабеење).
Додатоците во исхраната може да бидат корисна помош доколку се со проверен и стандарден состав и кога се земаат по препорака на стручно лице. Во спротивно во интеракцијата со лековите, ефектите на истите може да бидат негативни и да го нарушат здравјето на лицето кое ги пие.
Кај лековите постои следење на нуспојави и несакани дејства (варирање на крвниот притисок, пад на шеќерот во крвта…). Кај додатоците на исхраната таква регулатива се уште нема, а теба да ја има.
Како пожелна мерка на претпазливост при изборот на додатоци во исхраната, се препорачува да се одберат оние кои ги задоволуваат одредни критериуми на квалитет. Тоа се оние производители кои имаат сертификат што го потврдува спроведувањето на редовни анализи во акредитирани независни лаборатории.
Меѓусебното делување на храната и на лековите може да резултира двострано: адитивно (зголемено) делување на лекот или супресивно (намалено) делување. Советот е да се распрашате кај својот лекар или фармацевт за одредни лекови и додатоци на исхраната и меѓусебното нивно дејство.
