Истражување покажало дека квалитетниот цврст сон е подобар за здравјето отколку дремењето прекинато од аларм на секои десет минути. Истражувачите од Универзитетот Нотр Дам во САД откриле дека луѓето кои се будат по неколку аларми имаат поголема веројатност срцето да им чука побрзо од оние кои стануваат од креветот штом се огласи првиот аларм.
Постојаната забрзана работа на срцето во мирување е поврзана со низа негативни здравствени состојби, вклучувајќи срцеви заболувања и дијабетес.
Од 450 учесници во студијата, 57 отсто изјавиле дека имаат навика да одремат наутро помеѓу алармите, а не да станат директно од кревет. Студијата, исто така, открила дека оние кои дремат ќе го поминат својот последен час во кревет во полесен сон, во споредба со оние кои не дремат и спијат подлабоко.
Во друга студија, научниците од францускиот Национален институт за здравје и медицински истражувања следеле 7.000 иницијално здрави возрасни лица на возраст од 50 до 75 години десет години и откриле дека само едно од десет лице спие редовно.
Резултатите покажале дека учесниците кои добро спиеле имале 75 отсто помала инциденца на срцеви заболувања или мозочен удар од оние кои спиеле лошо. Во студијата на Нотр Дам, луѓето ја навеле неможноста да се разбудат по само еден аларм како најчеста причина за притискање на копчето за одложување, додека вториот најпопуларен одговор бил неспособноста да станат од удобноста на нивниот кревет.
Експертите велат дека општо е подобро за нас само да поставиме подоцен аларм отколку тој да ни го прекинува сонот на куси интервали.
“Вашето тело мрази да се буди со аларм затоа што тоа го плаши, па отчукувањата на срцето се зголемуваат, а хормоните на стрес се зголемуваат. Се чини малку чудно да му го правите ова на вашето тело повеќе пати наутро. Можеби не е смртоносно, но сигурно не ве подготвува добро за претстојниот ден“, вели експертот за спиење д-р Нил Стенли.
Помладите биле посклони кон дремење, а жените имале 12 отсто поголема веројатност од мажите да предремуваат помеѓу алармите. Луѓето кои често дремат имале речиси двојно поголема веројатност да доцнат на работа отколку луѓето кои веднаш стануваат.
Експертот за спиење објаснува и дека лицата кои предремуваат веројатно нема да се вратат во состојба на длабок сон откако ќе се огласи првиот аларм и им препорачува на луѓето да добијат старомодни будилници кои немаат функција за одложување за да помогне да се ослободат од оваа навика.
