Луѓето со благ КОВИД-19 веројатно се заразни пет дена, покажале резултатите од нова студија што ја спровеле научниците од Империал Колеџот од Лондон.
Ова е прво истражување кое открива колку трае заразноста по инфекција на поединци со коронавирус во заедница. Студијата упатува на тоа дека само секое петто лице било заразно пред да почнат да се јавуваат симптомите на вирусот.
Во две третини од слуаевите, пациентите биле заразни и петтиот ден по појавата на симптоми, а една четвртина од случаевите и по седум дена.
Заразените биле следени со детални дневни тестови за да се открие колку вирус испуштаат во нивната околина. Резултатите покажале дека домашните тестови не го откриваат со сигурност почетокот на инфекцијата, но можат безбедно да се користат за да се скрати самоизолацијата.
Научниците препорачуваат заболените со КОВИД-19 да се изолираат пет дена по почетокот на симптомите, а потоа да започнат да се тестираат од шестиот ден. Тие велат дека е безбедно да се прекине самоизолацијата доколку тестовите два дена по ред се негативни. Оние кои и понатаму се позитивни на вирусот можат да ја прекинат изолацијата дури десет дена од појавата на симптомите.
“Пред оваа студија ни недостасуваше голем дел од сликата за заразноста, но користејќи специјални дневни тестови и дневно евидентирање на симптомите, успеавме да го дефинираме ‘прозорецот’“ во кој луѓето се заразни за останатите“, вели главниот автор. на студијата, професор Аџит Лалвани.
“Ова е клучно за контролирање на било која пандемија и која било респираторна болест во заедницата“.
“Комбинирајќи ги нашите резултати со она што го знаеме од динамиката на заразата со омикрон, веруваме дека времетраењето на инфективноста е широко применливо за сите постоечки варијанти на овој коронавирус“, додава тој.
Во студијата, заразените со коронавирус биле следени од септември 2020 година до октомври 2021 година, вклучително и вакцинирани и невакцинирани. Потенцијален недостаток на студијата е тоа што нејзиниот примерок е релативно мал, односно следени се 57 пациенти.
Резултатите од истражувањето се објавени во стручното списание The Lancet Respiratory Medicine.
