Простатата е жлезда која е дел од репродуктивниот систем на мажите, чија главна улога е создавање семена течност. Сместена е под мочниот меур, на основата на машкиот полов орган и непосредно пред задното црево.
Проблемите со простата најчесто се јавуваат во средно доба, а меѓу другото се карактеризираат со болно мокрење и постојана потреба за мокрење. Можат да бидат од различна природа и јачина. Меѓу најчестите проблеми поврзани со простата се зголемена простата, воспаление на простатата и карцином на простата. Чаеви за простата и уринарниот тракт можат да помогнат во превенција и лекување и се алтернатива на конвенционалните лекови за простата.
Менувањето на животните навики можат да придонесат за подобро здравје на простатата, а во комбинација со одредени чаеви – за оптимално здравје на простатата.
Совети
Исхрана – За оптимално здравје на простатата, се препорачува зголемен внес на цинк и витамин Б6. Избегнувајте храна со премногу шеќер и заситени масти. Некои студии покажуваат дека во места каде што мажите имаат мал процент на проблеми со простатата, превладува диета базирана на риби и растителни извори на протеини.
Вежбање – вежбањето е генерално важно за здравјето и кардиоваскуларната функција, но може да помогне во превенирање на други болести, како и сексуални проблеми. Вежбањето е особено важно во случаи кога едно лице има прекумерна тежина и мора да поработи на губење на вишокот на телесна тежина (што може да помогне во превенција на рак на простата).
Стрес – обидете се да ги елиминирате работите во вашиот живот кои ви создаваат стрес, бидејќи стресот може да придонесе за болести на простатата и уринарни проблеми. Појавата на вакви проблеми, пак, може да доведе до дополнителен стрес и анксиозност.
Чаеви за простата
Многу чаеви кои се пијат за простатата содржат бројни антиоксиданти кои го промовираат здравјето на простатата, а некои од нив можат да помогнат во спречувањето на рак на простата. Се препорачува избегнување на кофеин во чаевите, бидејќи може да дејствува иритирачки за простатата и мочниот меур (обидете се да го избегнете и во други пијалаци). Освен чај, важно е да пиете и многу вода за да го хидрирате телото.
Во продолжение ви нудиме избор на четири чаеви кои најчесто се пијат за простата.
Зелен чај
Содржи бројни антиоксиданти и има антибактериски својства. Ова е од особена важност за луѓето кои имаат проблеми со уринарниот тракт, бидејќи може да помогне во превенција на инфекции и бактерии (како што е Ешерихија коли).
Овој чај е погоден за простатата и потенцијата. Истражувањата покажуваат дека зелениот чај е успешен во превенција на ракот на простатата, бидејќи го потиснува формирањето на клетките на ракот.
Подготовка: Ставете лажичка лисја од зелен чај во врела вода. Оставете да отстои неколку минути, па процедете и напијте се.
Чај од врбовица (свиловина)
Врбовица или свиловина е популарен народен лек за простатата и уринарниот тракт. Содржи антиоксиданти кои се борат против слободните радикали и го спречуваат создавањето на клетките на ракот. Како и зелениот чај, има антибактериски и антивирусни својства.
Подготовка: Чајот од свиловина може да го подготвите користејќи свежа или исушена билка. Прелијте ја со топла вода, после 5-10 минути процедете го чајот и пијте додека е топол. Најдобро е да се пие двапати дневно, наутро пред појадок и навечер пред вечера.
Чај од брусница
Плодот од брусница често се користи за превенција и лекување на болести на уринарниот тракт, и помага во ублажување на симптомите на проблеми со простатата. Особено може да помогне при зголемена простата. Брусниците, исто така, имаат антиканцерогени својства за сузбивање на рак на простата.
Подготовка: Најдобро е да користите суви брусници, кои ќе ги прелиете со врела вода и ќе оставите да отстојат 10 минути. Процедете и напијте се додека е уште топол чајот.
Чај од хибискус
Освен што ја подобрува севкупната состојба и има позитивен ефект врз крвниот притисок, има и одредени антиканцерогени својства, а тоа е особено важно за мажите кои страдаат од рак на простата.
Подготовка: Чајот од хибискус се прави од исушени или свежи цветови на хибискус, а може да се пие топол или оладен.
