Британските лекари предупредуваат дека се повеќе луѓе, најверојатно следејќи ги модните трендови носат затворени обувки без чорапи – тренд што може да го зголеми ризикот од габични инфекции на стапалата.
Верувале или не, нашите стапала преку потта во просек губат околу 200 мл течност дневно. Дури и ако носите кожени чевли, повеќето обувки се поставени со синтетички материјали кои не се прозрачни, па влагата, топлината и бактериите се задржуваат во внатрешноста на чевлите. Влагата и топлината меѓудругото го зголемуваат ризикот од појава на атлетско стапало, чести и заразни габични инфекции кои најчесто ја зафаќаат кожата меѓу прстите, но и кожата на табаните, како и ноктите.
Доколку и покрај сето ова не сакате да се откажете од навиката да носите обувки без чорапи обидете се барем да се придржувате до некои од основните совети во продолжение:
- За почеток не носете ги истите чевли секој ден;
- За да го забрзате сушењето на внатрешниот дел на обувките, до следното носење во нив ставете суви филтер-ќесички чај кои ќе ја впијат влагата;
- После носење на чевлите на боса нога, добро измијте ги и исушете стапалата;
- Со нанесување пудра или антиперспирант на стапалата, исто така, можете да го намалите потењето.
