Помеѓу јануари и април оваа година, приближно 0,01 процент од лицата вакцинирани со две дози вакцина заболеле од КОВИД-19, покажала американска студија која ја потврдува високата ефективност на вакцините. Во извештајот на Центарот за контрола и превенција на болести на САД (CDC) документирани се т.н. случаи на “пробив“ на вирусот меѓи 101 милион вакцинирани со две дози вакцина.
“Иако се работи за високо ефикасни вакцини, случаевите на пробив се очекувани, особено пред имунитетот во популацијата да достигне доволно ниво за дополнително намалување на трансмисијата“, се вели во извештајот. Истражувањето го опфатило периодот од 1. јануари до 30. април.
Документирани биле вкупно 10.262 инфекции, две недели или подолго по вакцинирањето и со втора доза со една од вакцините одобрени во САД – Фајзер, Модерна и Џонсон и Џонсон. Просечната возраст на тие пациенти изнесувала 58 години, а во повеќето, во 63 проценти од слуаевите се работело за жени.
Од вкупниот број на пробиви, 706 случаи или седум проценти од заболените биле хоспитализирани, а 132 или еден процент починале поради причини поврзани со КОВИД-19. Останатите биле благи или асимптоматски случаи кои се откриени со рутинско тестирање.
Тоа значи дека стапката на хоспитализација во вкупниот број вакцинирани е приближно 0,0007 проценти, а стапката на смртност 0,0001 процент. Геномското секвенционирање на достапните случаи на инфекција покажало дека најчестата варијанта на вирусот во случаевите на пробив била британската – В.1.1.7.
“Бројот на заболувања, хоспитализација и смртност што ги спречило вакцинирањето далеку ги надминува случаевите на пробив“, пишуваат авторите.
CDC сепак напоменува дека е многу веројатно бројот на случаи на пробив да е поголем, оти лицата кои се вакцинираат со две дози вакцина, ретко редовно се тестираат.
