Лесна болка во грлото, замор, болки во мускулите како кај грипот и благо покачена телесна температура се најчестите симптоми кај пациентите заразени со варијаната на коронавирусот – омикрон, а кои се лекувани во неколку болници во Индија.
Од 14 случаи во болница во Мумбај, осум биле асимптоматски, а 13 биле пуштени на домашно лекување.
“Лицата кои имаа симптоми, главно се жалеа на болка во грлото, замор и болки во телото“, вели дежурниот лекар во болницата и додава дека не е забележана прогресија на болеста.
Комјутерската томографија на белите дробови покажала дека кај ниту еден пациент не дошло до промени на тој орган, што би можело да значи дека омикрон не предизвикува тешки воспаленија на белите дробови како некои досегашни варијанти на коронавирусот.
Од 35 случаи во друга болница, половината немале никакви симптоми. Останатите пријавиле течење на нос, благо покачена температира и блага кашлица. Меѓу нив, 25 лица биле вакцинирани, а петмина биле малолетни.
Интересно, но ниту еден пацинет не изгубил осет за мирис или вкус што досега беше редовна појава кај инфекциите со коронавирус.
Меѓутоа, лекарите истакнуваат дека се уште немале доволно пациенти за да можат да донесат општи заклучоци. Додаваат дека за разлика од инфекцијата со делта варијанатата кога пациентите имале повремени скокови во телесната температура, кај омикрон тоа не е забележано.
