Печурките помагаат при проблеми со памтењето

Иако не може да се тврди дека постои директна поврзаност меѓу консумирањето шампињони и мозочните функции, личностите кои имаат обичај да јадат печурки два пати неделно имаат помалку потешкотии со памтењето.

Неодамнешно истражување на научници од Сингапур укажало на тоа дека редовното консумирање печурки (шампињони) би можело да помогне во зачувувањето на когнитивните функции кај постарите личности. Во истражувањето учествувале преку 600 испитаници постари од 60 години, а нивниот режим на исхрана, како и когнитивните способности следени се во текот на 6 години, односно од 2011 до 2017 година.

Авторите на студијата заклучиле дека иако не може да се тврди дека постои директна поврзаност меѓу консумирањето шампињони и мозочните функции, личностите кои имаат обичај да јадат печурки два пати неделно имаат помалку потешкотии со памтењето од личностите кои јадат печурки помалку од еднаш неделно. Се проценува дека ризикот од полесни когнитивни тегоби на овој начин е намален за 43 отсто, додека со три порции неделно овој ризик се намалува за 52 отсто.

За протективното дејство на шампињоните заслужни се антиоксидантите и противвоспалителните состојки кои овие печурки ги содржат и кои можат да спречат таложење на бета-амилоидите и тау протеините во мозокот што е присутно кај Алцхајмеровата болест.