Со губење на само 5 % од вкупната телесна тежина, на телото се забележуваат повеќе промени, што автоматски го подобрува расположението и го олеснува секојдневниот живот. Ова значи дека лицето од 80 кг, на пример, треба да изгуби само 4 кг за да се чувствува подобро и да ги намали своите здравствени проблеми.
Еве што точно се случува со нашето тело кога ќе изгубиме 5 % од масното ткиво…
Растоварување на зглобовите
Само 4,5 килограми вишок прави притисок од 18 килограми на долниот дел на грбот, колковите, колената и глуждовите. Овој екстра притисок побрзо ги троши ‘рскавицата и зглобовите. Прекумерната тежина, исто така, може да доведе и до воспаление на зглобовите, а со губењето на килограмите може да се избегне оптоварувањето на зглобовите и артритисот во повозрасно доба.
Превенција од дијабетес тип 2
Ако имате вишок на килограми, слабеењето е еден од двата начини за да се спречи или одложи дијабетесот. Другиот начин е редовно и умерено вежбање, 5 дена во неделата по 30 минути. Ако веќе имате дијабетес, губењето на тежината може да ви помогне да земате помалку лекови, да го контролирате шеќерот во крвта и да ја намалите веројатноста за појава на други здравствени проблеми.
Подолг и подобар квалитет сон
Губењето на телесната тежина автоматски го подобрува квалитетот на спиењето. Истражувањата покажале дека луѓето кои загубиле 5 % од масното ткиво во просек спијат 21,6 минути подолго во текот на ноќта.
Намалување на лошиот (LDL) и покачување на добриот (HDL) холестерол
Со здравата исхрана и губењето на килограми може да го намалите нивото на ЛДЛ холестеролот. Исто така, е важно да се зголеми нивото на ХДЛ холестеролот, кој го „брише“ ЛДЛ во крвта, а вие можете да го зголемите со вежбање и воведување на соодветни намирници во секојдневната исхрана, како што е, на пример, мелен лен. Зголемувањето на HDL холестеролот ги намалува шансите за развој на срцеви заболувања.
Поретки воспаленија Масните клетки, особено оние околу стомакот, можат да ослободуваат хемикалии кои иритираат и предизвикуваат воспаление на ткивото низ целото тело. Воспалението е поврзано со здравствени проблеми како што се артритис, срцев и мозочен удар.
Намалување на триглицеридите во крвта
Тоа се честички во телото што ги пренесуваат мастите за складирање и енергија. Високото ниво (повеќе од 200 mg/dl) може да значи поголема веројатност за појава на срцев или мозочен удар. Со губење на тежината можете да го регулира нивото на триглицериди во крвта и да го зачувате вашето здравје
Намалување на високиот крвен притисок
Зголемената телесна тежина влијае на структурата на ѕидот на артериите, кои поради вишокот на килограми се обложени со маснотии. Ова влијае на зголемување на крвниот притисок. Со слабеењето можете да ги отстраните мастите од ѕидот на артериите што ќе влијае позитивно на крвниот притисок. Ако го намалите внесот на сол, а го зголемите зеленчукот, овошјето и млечните производи со ниска масленост, сигурно, ќе го намалите и високиот крвен притисок.
Помали шанси за рак
Вишокот килограми ги зголемува шансите за рак на дојка, дебело црево, бубрези, јајници, грлото на матката и простата. Не постои јасен доказ дека губењето на тежината заштитува од оваа болест, но во телото на лице со вишок килограми се одвиваат одредени промени кои можат да предизвикаат рак.
Стоп за ноќната апнеја
Луѓето со прекумерна тежина со тек на времето добиваат дополнително ткиво во задниот дел од грлото. За време на спиењето, телото се опушта, а ова дополнително ткиво може да се спушти и да го блокира вашиот пат за дишење. Ова може да предизвика интервали со прекини на дишењето, што може да го загрози здравјето на срцето и мозокот.
Подобро расположение
Губењето на тежината дефинитивно го поправа расположението. Научниците се уште се обидуваат да ја разјаснат оваа поврзаност, но сметаат дека поради губење на килограмите, на расположението му влијаат подобриот сон и зголемувањето на самодовербата. Истражувањата покажуваат дека луѓето можат да излезат од депресија ако изгубат најмалку 5% од телесната маса.
Повеќе секс
Луѓето со вишок на килограми немаат голема желба за секс. Причина за тоа се недостаток на самодоверба, лошо расположение, но, исто така, и дисбаланс на хормоните, кои инаку ја потенцираат желбата за секс, пишува www.webmd.com.
